Алматыда қызметіне танымал қазақстандық вайнерлер тартылған "Mudarabah Сapital" және "Astex" қаржы пирамидаларына қатысты атышулы іс бойынша сот талқылауы жалғасып жатыр, деп хабарлайды Ulysmedia.kz.
Сот процесінде сотталушылардың бірі – "Mudarabah Capital" ЖШС бұрынғы қаржы директоры Тимур Рүстемовтен жауап алынды.
Процеске қатысушы бұрынғы қаржы директорынан тергеу кезінде оған вайнер Мейіржан Төребаевқа қарсы айғақтар беру ұсынылғаны жайлы ақпараттың қаншалықты шындыққа жанасатынын сұрады.
"Тергеуші Омаров маған іс бойынша куәгер мәртебесінде болғанымда: "Маған вайнерлерге қарсы айғақ бер, сонда сен куәгер мәртебесінде болу мерзіміңді ұзартасың", - деді. Бұл мамыр-маусым айларында болды (2022 ж. – автор). Мен адамға нақақтан-нақақ жала жаба алмаймын дедім. Ол былай дейді: "Міне, олар барлық жерге ұшады (демалу үшін – шамамен. авт), жұрттың бәрі ақшаның соларда екенін біледі". Егер Мейіржанға (Төребаев), Азимге (Әзімжан Саидбаев), Мейірханға (Шерниязов) қарсы айғақтар берсем, маған жеңіл болатынын айтты”, – деді "Mudarabah Capital"компаниясының бұрынғы қаржы директоры.
Ол сондай-ақ бастапқыда "Mudarabah Сapital" қызметін жарнамалау үшін вайнерлерді тартуға қарсы болғанын айтты.
"Мен қаржы маманы ретінде тәуекелдерді басқару деген не екенін білемін. Ең алдымен, мен Әділет Оразға (қаржы пирамидасын құрды деген күдікті, қашып жүр – авт.) олардың қатысуына, жарнамасына қарсы екенімді айттым", - деді Рүстемов.
Ол мұны "Astex.kz" басшылығының жұмыс процесін бақылай алатынына сенімді болмағанымен түсіндірді.
"Екіншіден, мен олардың бұған дейін "Ломбард-24" және т.б. жағымсыз тәжірибесі барын білемін, олар жарнамалық жасаушы ретінде шақырылған", - деп атап өтті ол.
"Үшіншіден, сол кездегі ең маңыздысы, олар патруль туралы фильмде түсіп жатты, полиция туралы роликтер болды. Мен билікті мазақ етуге, полицияны келемеждейтін дүниелер түсіруге қарсымын, себебі бұл қауіпті. Мен мұны Мейіржанға тікелей айтып, Әзімге де айттым", - деп түсіндірді Рүстемов.
"Кек алды", – деді бұл уәжге "Mudarabah Capital " ЖШС-нің бұрынғы директоры Руслан Бүркенов.
Естеріңізге сала кетейік, бұл іс бойынша қаржы пирамидасын ұйымдастырушылардан басқа белгілі қазақстандық вайнерлер – Мейірхан Шерниязов, Мейіржан Төребаев және Әзімжан Саидбаевқа (іздеуде) айып тағылған. Тергеу мәліметтері бойынша, олардың кінәсі – пирамиданың қызметін жарнамалаған, сонымен қатар құрылтайшылар қатарында болған.
Іс бойынша сотталушылар қатарында барлығы 12 адам бар. Екеуіне халықаралық іздеу жарияланған.
Еске салайық, бұдан бұрын сот отырысында вайнерлердің компания жұмысына неліктен тартылғаны айтылған.
