Аурухана басшылығына қатысты сотқа дейінгі тергеу амалдары жүргізіліп жатыр. Бұрынғы бас дәрігер Ерлан Аяғанов өз еркімен арыз жазған деп хабарлайды ulysmedia.kz жергілікті басылымға сілтеме жасап.
Көкшетау қалалық ауруханасының ұжымы Ақмола облысының әкімі Ермек Маржықпаевқа жұмыстан кеткен бас дәрігер Ерлан Аяғановты қызметіне қайтаруды сұрап жүгінді.
«Кеше кешке денсаулық сақтау басқармасы басшысының орынбасары келіп, 25 қазанда бас дәрігеріміз Аяғанов жұмыстан кету туралы арыз жазғанын айтты. Ал қазір не болып жатқанын түсінбейміз. Ол бұрынғы басшылардың кесірінен ыдырап жатқан уақытта келген болатын», - дейді «Көкшетау қалалық көпсалалы ауруханасы» ШЖҚ МКҚК қабылдау бөлімінің меңгерушісі Әлия Кенжебекова.
Оның айтуынша, бар болғаны жарты жыл ішінде ауруханада жөндеулер жүргізіліп, жиһаздар әкелінген. Сондай-ақ, жұмыс істеуге барлық жағдай жасалып, көптеген оң өзгерістер болған.
«Себебін өзінен сұрағанымызбен, бізге жұмысымызды жалғастырғанымыз жөн екенін айтты.Бірақ біз оны жұмыстан шығару туралы шешіммен мүлдем келіспейміз. Еңбек демалысында немесе емделіп жатқандарды қоспағанда, барлығы 37 дәрігер Ақмола облысының әкімі мен денсаулық сақтау басқармасына хат жазып, басшыны қайтармаса, жұмыстан босату туралы арыз береміз. Басқа басшымен жұмыс істеуге келіспейміз», - деді Әлия Кенжебекова.
Ол аурухана қызметкерлерінің хатымен Ерлан Аяғановтың өзі де хабарсыз екенін айтты.
Ақмола облысының денсаулық сақтау басқармасы аурухана басшыларына қатысты сотқа дейінгі тергеу амалдары жүргізіліп жатқанын хабарлады.
«ҚР Қылмыстық іс жүргізу кодексінің 201, Қылмыстық кодексінің 407-баптарына сәйкес сотқа дейінгі тергеп-тексеру деректері жария етілуге жатпайды. 25 қазаннан бастап Қазақстан Республикасы Еңбек кодексінің 56-бабының 2-тармағына («Қызметкердің бастамасы бойынша еңбек шартын бұзу») сәйкес медициналық ұйымның бірінші басшысымен еңбек қатынастары тоқтатылды, 2021 жылдан бастап МҚК бас дәрігерінің міндеті оның орынбасарына жүктелді», - деп атап өтті департамент.
