Батыс Қазақстан облысында Теректі ауданы Подстепное ауылы мен Орал қаласында халықты алдын ала эвакуациялау жұмыстары жүргізілді, деп хабарлайды Ulysmedia.kz.
Төтенше жағдайлар министрлігінің хабарлауынша, егістіктерден еріген қар суының үлкен көлемінің Ұзынкөл су қоймасына ағуына байланысты оның толып кетіп, Батыс Қазақстан облысының Теректі ауданындағы Ұзынкөл кентін су басу қаупі туындаған. Осыған байланысты Теректі ауданы Подстепное ауылында және Орал қаласында халықты алдын ала эвакуациялау жүргізілген.
– Барлығы 750 адам, оның ішінде 230 бала эвакуацияланды. Су тасқынына қарсы іс-шараларды жүргізу және эвакуациялау үшін 112 адам және 39 бірлік ТЖМ, ЖАО, ПД түрлі техникасы жұмылдырылды. Су қоймасы бөгетінің денесін нығайту бойынша іс-шаралар жүргізілуде, жұмыстар жалғасуда. Ұзынкөл су қоймасы бұзылған жағдайда Ұзынкөл, Юбилейное, Кемер, Жаңа Өмір және Барбастау ауылдарын су басу қаупі бар, – деп хабарлайды ТЖМ.
Су тасқыны қаупі бар өңірдің бірі – Қарағанды облысы
2 сәуірде үкімет басшысы Олжас Бектенов бүгін су тасқынына байланысты үкімет мүшелері мен министрлерге бірқатар тапсырма берді. Оның айтуынша, эвакуациялау – бірінші кезекте, халықтың қауіпсіздігін қамтамасыз етуге бағытталған. Бектенов сол себепті құтқарушылардың жұмысын қиындатпай, оларға қарсылық емес, керісінше, қолдау көрсету керектігін айтады.
Қазақстанның бірнеше өңірінің халқы неше күннен бері су тасқыны азабын көріп жатыр. Төтенше жағдайлар министрлігі су тасқының жағдайына “тұрақты-күрделі” деп баға береді. Батыс аймақтарда су аздап төмендеген, орталық, солтүстік және шығыс бөліктерінде керісінше өзендер деңгейінің қарқынды жоғарлауы байқалады. Су басу аймағында 5 облыстар қалуда, әкімдіктермен жергілікті ауқымдағы 20 төтенше жағдай жарияланған. Бес облыстың бірі – Батыс Қазақстан өңірі.
