Ақмола облысындағы Макинск қаласындағы үйлерді су басты, деп хабарлайды Ulysmedia.kz.
Әлеуметтік желіде қаладағы қазіргі жағдай туралы видеолар тарады. Видеодан қаладағы көшені су басқанын көруге болады.
- Көшені де, үйді де, арықты да су басты, дейді видео авторы.
ӘКІМДІК НЕ ДЕЙДІ
Бұл жайтқа қатысты Бұланды ауданының әкімдігі пікір білдірді.
- 4 сәуірде Макинск қаласында қардың еруі мен мол жауын-шашынның салдарынан арық жүйесі тасып кеткен. Қала аумағында су тасу жағдайлары тіркеліп отыр. Осыған байланысты Макинск қаласында жергілікті атқарушы органдар, коммуналдық қызмет және төтенше жағдайлар бөлімінің өкілдерінен құрылған кезекші топтар су басқан үйлердің тұрғындарына көмек көрсетуде. Қазіргі уақытта тұрғын үйлердің аумағынан суды сору, арықтарды тереңдетіп, қосымша өткізу жолдарын ашу жұмыстары жүргізіліп жатыр, дейді әкімдіктегілер.
Сонымен қатар, Ұлысмедиа Ақмола облысының әкімдігінен бұл жағдайға қатысты жауап беруін сұрады.
БҰҒАН ДЕЙІН
Еске салайық, бұған дейін Петропавлда 4-5 сәуірде су тасқынының бірінші толқыны болуы мүмкін екені хабарланған болатын. Сонымен қатар, Қазгидромет мамандары су тасқыны болуы мүмкін бес облысты атаған еді. Оның ішінде, Ақмола облысы да бар.
Көктемгі су тасқынында қаупі жоғарыға Целиноград, Аршалы, Атбасар, Астрахан, Зеренді, Ерейментау, Жаркайың, Сандықтау, Есіл, Жақсы аудандары, Қосшы қаласы; қаупі орташаға: Ақкөл, Бұланды, Қорғалжын, Бурабай, Шортанды, Біржан сал аудандары, Көкшетау қ.; қаупі төменге: Егіндікөл ауданы мен Степногорск қаласы жатады.
