Кеше Макинскіде көлік қағып кеткен сегіз жасар қыз анасының көз алдында қаза тапты. Әйел баласын қарсы алуға шыққан кезде, Мәскеу көшесінде Mercedes көлігі мектеп оқушысын қағып кеткен. Енді жергілікті тұрғындар бұл жолда неге әлі күнге дейін тротуар мен қауіпсіз жаяу жүргінші өткелдері жоқ екенін сұрап отыр, деп хабарлайды Ulysmedia.kz.
Мән-жай
Жол апаты 7 қыркүйек күні шамамен сағат 18:00-де болған. Мектеп оқушысы үйіне қайтып келе жатқан, ал анасы оны қарсы алуға шыққан. Алайда қыз үйіне жете алмады. Mercedes көлігі оны анасының көз алдында қағып кеткен.
Қыз басынан ауыр жарақат алып, шұғыл түрде ауруханаға жеткізілген. Дәрігерлер оның өмірін сақтап қала алмады.
Полицияның мәліметінше, сегіз жасар қыз жолдың белгіленбеген жерінен өткен. Қазір тергеу жүріп жатыр.
Алайда баланың қазасынан кейін Макинск тұрғындары басқа мәселеге де назар аударды. Оқиға болған Мәскеу көшесінде тротуар жоқ. Сондықтан жаяу жүргіншілер жол жиегімен жүруге мәжбүр.
– Бұл Макинскіде дұрыс жол да, тротуар да жоқ. Адамдар жол жиегімен өз өміріне қауіп төндіріп жүр, – деп жазған қала тұрғындары.
Тротуар қайда?
Мәскеу көшесіне асфальт былтыр ғана төселген. Әкімдіктің түсіндіруінше, ол кезде жұмыстар қарызға жасалып, ақшасы биыл төленген. Ал тротуарлар жобаға енгізілгенімен, әзірше оған бюджетте қаражат қарастырылмаған.
Тұрғындардың айтуынша, жол жөнделіп, асфальты тегістелгеннен кейін кейбір жүргізушілер көліктерін бұрынғыдан да қаттырақ айдай бастаған.
Енді тұрғындар келесі қайғылы жағдайды күтпей, көшені қауіпсіз етуді талап етіп отыр.
– Қаламызда қай жерде жол сәл тегіс әрі жаңа болса, жүргізушілер бірден қатты жылдамдықпен жүре бастайды, шектеулерге де қарамайды. Мұндай жолдарға бірден жасанды жол кедергілерін орнату керек. Әлде осындай қайғы болғанын күтуіміз керек пе? – деп ашынды қала тұрғындарының бірі.
Алайда басқа тұрғындар тек жасанды жол кедергілерін орнату жеткіліксіз деп есептейді. Қала тұрғындарының айтуынша, кейбір жүргізушілер оларды айналып өтіп, жол жиегімен жылдамдығын бәсеңдетпей жүріп кетеді.
Сондай-ақ Mercedes көлігін тізгіндеген ер адамның бұған дейін де жол қозғалысы ережесін бұзғаны үшін жауапкершілікке тартылғаны белгілі болды.
Жыл басынан бері Ақмола облысында тоғыз адамды көлік қағып кеткен.
