Алматыда жаңа пәтерлердің бағасы бір айда күрт қымбаттап кетті, деп хабарлайды Ulysmedia.kz.
ТОЛЫҒЫРАҚ
Datahub мәліметінше, қазан айында Алматыдағы жаңа пәтерлердің бағасы қыркүйекпен салыстырғанда 2,9%-ға көтерілді. Соңғы бірнеше ай бойы баға өзгермей тұрғанын ескерсек, бұл — айтарлықтай нәтиже.
Биыл бұдан да жоғары өсім бір рет тіркелген, бірақ жалпы алғанда мұндай қарқынды айлық қымбаттау – сирек болатын жағдай. 2015 жылдан бері бір айда бұдан күштірек өсу тек жеті рет болған.
Алматының қайталама нарығында да (ескі үйлер)баға өсімі байқалды — бір айда 2,1%-ға артты. Бұған дейін де биыл қайта сату нарығындағы пәтерлер ай сайын орта есеппен 2%-ға қымбаттап келген. Пәтер жалдау ақысын да өсім айналып өтпеді: қазан айында жалдау 1,7%-ға қымбаттады. Бұл — соңғы екі жылдағы дәл осы айдағы көрсеткіштерден жоғары.
АСТАНАДАҒЫ ЖАҒДАЙ
Астанада жағдай тұрақты: жаңа да, ескі пәтерлердің бағасы өзгермеген. Өспеген, бірақ төмендеген де жоқ. Дегенмен соңғы айларда елордадағы жаңа құрылыстардың бағасы біраз көтерілгені белгілі. Ал жалдау ақысы қазан айында 0,5%-ға артқан.
