Қазақстанда жыл басынан бері азық-түліктің кей түрлері айтарлықтай қымбаттаған, деп хабарлайды Ulysmedia.kz.
Бұл туралы Стратегиялық жоспарлау және реформалар агенттігінің Ұлттық статистика бюросы мәлім етті.
2024 жылдың тоғыз айында еліміз бойынша азық-түлік тауарларының бағасы орташа есеппен 2,9%-ға көтерілді, – делінген ақпаратта.
2024 жылғы қаңтар-қыркүйекте нан 6,2%-ға қымбаттады. Оның ішінде қара бидай наны – 8,4%, жоғары сұрыпты бидай наны – 6,4%, бірінші сұрыпты бидай наны – 5,4% қымбаттаған.
Өткен тоғыз айда сүт өнімдерінің бағасы 4,3%-ға өсті. Жас ірімшік бағасының өсуі 6%, ашытылған сүт өнімдері – 4,8%, ірімшік пен сүзбе – 2,7% қымбаттады.
Ет және ет өнімдерінің бағасы жыл басынан бері 2,6% өсті. Құс еті – 4,7%-ға, шұжық өнімдері – 4,1%-ға, ет өнімдері – 2,6%-ға, шошқа еті – 2%-ға, сиыр еті – 1,9%-ға, жылқы еті – 1,2%-ға қымбаттаған.
