Украинада соғысып жүрген қазақтардың сұхбаты жарияланды, деп хабарлайды Ulysmedia.kz.
“СОҒЫСҚА БАРА ЖАТҚАНЫМДЫ БІЛМЕДІМ”
Украиналық блогер, журналист Володимир Золкинге сұхбат бергендердің екеуі Қазақстан азаматы, тағы біреуі РФ азаматы. Алайда үшеуінің де тегі қазақ. Үшеуі де арнайы келісімшартқа қол қойып келген. Екеуі де 2002 жылы туған. Қазақстандық азамат Ресейде вахталық әдіспен жұмыс істеп жүрген.
- Мен келісімге қол қойып, ақша алып, бөлімшеде қаламын деп ойладым. Келісімшартқа қол қоярымда мені соғысқа жіберетіндерін айтпады. Егер келісімшартқа қол қойсам, маған РФ азаматтығын беретіндерін айтты. Барып, соғыссам болғаны. Ол жерде соғыс болып жатқанын сезінбедім. Кинодағыдай болады деп ойладым. Мен келгенде маған бір аймақты ғана күзетесің деп айтты, бірақ олай болмай шықты, деді сұхбат берген қазақстандық азамат.
“МЕНІҢ ОТАНЫМ – РЕСЕЙ”
Соғысқа қатысқан тағы бір қазақ та алданғанын айтты. Ол келісімшартқа қол қоярда “сен байланыс қызметкері боласың, барлық жағдай жасалады” деп айтқан. Қазақ жігіті соғыста танк айдаған.
- Ол кезде жұмыстан жолым болмай жүрді. Несін жасырамын, ақшам болмады. Егер олар ақша ұсынбаса соғысқа бармас едім. Бір жарым аптадай оқудан өттік. Сол кезде “байланыс қызметкері” емес екенімді түсіндім. Соғыста танк айдадым. Жан-жағымыздан атып жатты, қатты дауыстар естілді, дейді жігіт.
Сонымен қатар, ол “егер Ресей Қазақстанға басып кірсе, кімнің жағында соғысасың?” деген сұраққа жауап берді.
- Менің отаным – Ресей, дейді ресейлік қазақ.
ҮШІНШІ ҚАЗАҚ
Соғысқа қатысқан үшінші қазақ та “ақшадан қысылып, Ресейге келіп, келісімшартқа қол қойғанын” айтты.
- Мен өзім Байқоңырдың тумасымын. Жаңалықтардан, ел-жұрттан соғысқа барып келуге болатынын естідім. Тек ақша жайлы айтатын. Қайтадан соғысқа бармас едім. Келісімшартқа 2024 жылы маусымда қол қойып, сосын күттім. Кейін мені Донецкіге апарды, сол жерде бір айдай оқудан өттік. Артынан соғысқа жіберді. Бізді топқа бөліп тастады. Мен бірнеше қызмет атқардым. Біз барған жерде бәрі қирап жатты, дейді қазақ жігіті.
“ӨМІР СҮРГІМ КЕЛЕДІ” ЖОБАСЫ
Еске салайық, Украинадағы "Өмір сүргім келеді" жобасы Ресей әскері сапында соғысып жүрген қазақстандықтардың тізімін жариялаған болатын. Тізімде жалпы 661 адам бар.
264 ҚАЗАҚСТАНДЫҚ БАР
Бұл туралы X әлеуметтік желісінде “Өмір сүргім келеді” жобасының парақшасында жарияланған.
“Ресей армиясы қатарында қызмет ететін шетелдік жалдамалылар туралы жарияланымдар сериясын бастаймыз. Алғашқы ел – Ұжымдық қауіпсіздік туралы шарт ұйымына (ҰҚШҰ) мүше Қазақстан Республикасы.”- деп жазған желідегі парақшада.
Суреттегі тізімнен 264 адамды көруге болады. Олардың арасында Әбдіраш Нұрболат, Әбілдин Серік, Әбілжанов Ержан,Әуелбеков Қуат секілді қазақ азаматтары да байқалады.
