Қазақстандық фуд-блогер Руслан Ибрагимов ерекше аспаздық тәжірибесімен әлеуметтік желі қолданушыларының назарын аударды, деп хабарлайды Ulysmedia.kz.
ТОЛЫҒЫРАҚ
Instagram парақшасында ол аудитория назарына «қара бешбармақтың» дайындалу процесін көрсеткен видеосын ұсынды.
Видеода блогер әдеттегідей ұлттық тағамды әзірлеу жолын көрсетеді, алайда бұл жолы басты ерекшелік — кеспеге қосылған ұнтақталған белсендірілген көмірдің арқасында оның қара түске боялуы. Видео басталғанда Ибрагимов дайын тағамды етпен бірге татып көріп, «Қара бешбармақ» деп жариялайды.
— Қара палау жасап жүр, енді — қара бешбармақ. Оны асықпай, жай ғана дайындадым, сия қолданған жоқпын — ондайда қамыр одан да қара болар еді. Дәмі — кәдімгі классикалық нұсқасындай, — деп жазды блогер жазбасында. Сондай-ақ оқырмандарына: «Қалай ойлайсыздар?» деген сауал жолдады.
Алайда аудиторияның реакциясы негізінен жағымсыз болды. Көпшілік бұл тәжірибені орынсыз әрі ұлттық тағамға деген құрметсіздік деп қабылдады:
«Бұл дәстүрге құрметсіздік — бешбармақты мазақ етіп жатыр»
«Тәбетсіз көрінеді, тіпті жиренішті»
«Бұл — біздің тағам, оны көшпенділер осылай жеген — өзгертуге болмайды»
«Жоқ, Рус, бұлай енді жасама»
«Бұл 15 жыл бұрын сәнге айналған еді — ол кезде де ұнамаған»
Бірақ сынға қарамастан, кейбір оқырмандар бұл тәжірибені әзілмен қабылдап, оны «белсендірілген бешбармақ» деп атап, автордың шығармашылығын жоғары бағалады.
