2021 жылғы қыркүйекте қазақстандық қызметкерлердің орташа атаулы жалақысы 257 030 теңгені құрады, деп хабарлайды ulysmedia.kz.
Ұлттық статистика бюросының мәліметінше, көрсеткіш өткен жылдың күзінен бастап өсіп келеді. 2020 жылдың қазан айында ол 209 818 теңгеге, қарашада – 211 033 теңгеге, желтоқсанда – 220 848 теңгеге, 2021 жылдың қаңтар айында – 222 261, ақпанда – 223 213, наурызда – 224 715, сәуірде – 231 319, мамырда – 232 347, маусымда – 242 542, шілдеде – 252 766, тамызда – 256 455 теңгеге жетті.
Сонымен қатар 2021 жылғы тамыз айының қорытындысы бойынша, халықтың орта есеппен жан басына шаққандағы атаулы табысы 130 590 теңгені құрады, бұл жыл ішінде 15,3%-ға өскен.
Бұл ретте, нақты ақшалай табыс көрсетілген кезеңде 6,1%-ға артты, деп қосты бюро.
Ұлттық статистика бюросында Қазақстандағы жұмыссыздар туралы деректер де келтірілген. Олардың саны 2021 жылғы қыркүйекте 451,6 мың адамды немесе жұмыс күшіне 4,9%-ды құрады. Бірақ жұмыспен қамту органдарында тіркелгендер саны аз – 210,1 мың немесе жұмыс күшіне 2,3%.
