Үкіметтегі брифинг барысында Қазақстанның өнеркәсіп және құрылыс министрі Қанат Шарлапаев "АрселорМиттал Теміртау" кәсіпорнын мемлекет меншігіне қайтаруға қатысты сұрақтарға жауап берді, деп хабарлайды Ulysmedia.kz.
Министр Үкімет компаниямен ұзақ уақыт бойы келіссөздер жүргізгенін атап өтті.
"Біз алдын ала құжаттарға 22 қазанда қол қойдық. Өздеріңіз білетіндей, "АрселорМиттал Теміртау" қол қою рәсімі қайғылы оқиғаға дейін болғандығы туралы ақпаратты растады. Келіссөздер тез жүргізілді деп айту дұрыс емес. Алдын ала келісімдер 22 қазанда жасалғанын тағы да қайталап өтемін", - деді ол.
Сарапшылардың айтуынша, Лакшми Миттал Қазақстанның үстінен халықаралық соттарға шағым түсіре алады.
"Бұл жағдайда біз егжей-тегжейлі заң жұмыстарын жүргізіп жатырмыз. Осы инвестор акционерлер құрамынан шыққаннан кейін Қазақстанды одан әрі сот істерінен қорғау үшін", - деді Шарлапаев.
Сондай-ақ, министр компанияның атауы өзгеруі мүмкін екенін мәлім етті.
"Шешім әлі қабылданбады. Бірақ инвестордың қазақстандық кәсіпорын акционерлерінің құрамынан шығуына байланысты біз "АрселорМиттал Теміртау" атауын пайдалана алмаймыз. Мұнда қызметкерлердің пікірін ескеру маңызды болады", - деді ол.
Айта кетейік, бұдан бұрын үкімет басшысы Әлихан Смайылов компанияны мемлекет меншігіне беру процесі аяқталуға жақын екенін мәлімдеген.
Еске салайық, 28 қазанға қараған түні «АрселорМиттал Теміртау» кенішінде жарылыс болды. Жарылыс кезінде шахтада 252 адам болған, 206 кенші жер бетіне шықты, қалғандары жер астында қалып қойды.
Қазақстан президенті Тоқаев «АрселорМиттал Теміртаумен» ынтымақтастықты тоқтатуды бұйырды. Қайғылы оқиға бойынша сотқа дейінгі тергеу басталды.
Сондай-ақ, үкіметтің «АрселорМиттал Теміртау» АҚ акционерлерімен алдын ала келісімге келгені және кәсіпорынды Қазақстанның пайдасына меншік құқығына беру жөніндегі мәміленің аяқталып жатқаны хабарланды.
Қарағанды облысына барып, марқұм кеншілердің туыстарымен кездескен Тоқаев 29 қазанды жалпыұлттық аза тұту күні деп жариялады. Сонымен қатар, президент «АрселорМиттал Теміртау» біздің тарихымыздағы ең нашар компания екенін атап өтті.
Қазақстанда "АрселорМиттал Теміртау" АҚ инвесторы Лакшми Миттал мен басқарушы Палаватху Кришнанды "қызметкерлердің қауіпсіздігін қамтамасыз етудегі қасақана әрекетсіздігі" үшін қылмыстық жауапкершілікке тартуды талап ететін петицияға қол жинау басталды.
