Өнеркәсіп және құрылыс министрі Қанат Шарлапаев үнді миллиардері Лакшми Миталлдың орнына басқа шетелдік инвестор келмейтініне сендірді, деп хабарлайды Ulysmedia.kz.
Үкіметтегі брифинг барысында журналистер Шарлапаевтан Миталлдың орнын кім басатынын және мемлекет кеншілерге жұмысынан айырылмайтынына кепілдік беретін-бермейтінін сұрады.
"Үкімет меншік құқығы Қазақстанның пайдасына өткеннен кейін ешқандай шетелдік инвесторларды қарастырмайды. Бірнеше рет хабарланғандай, кәсіподақтармен ұжымдық шарттарға негізделген кәсіпорындардың барлық шарттары, еңбекақы, қызметкерлер саны жаңа инвестор келген кезде өзгеріссіз қалады", - деді министр.
Сондай-ақ, Ulysmedia тілшісі Қазақстанның экс-премьер-министрі Серік Ахметовтің АМТ шахталарының жаңа инвесторы болу ықтималдығы жөнінде сұрады.
"Мен нақты қандай инвестор келетіні жөнінде қазір ешқандай түсініктеме бермеймін. Мен бұл активке шетелдік инвесторларды тартуды жоспарламайтынымыз туралы айтып отырмын. Кәсіпорын өзінің жұмыс қабілеттілігін сақтайды", - деді Шарлапаев және Ахметовпен келіссөз жүргізілмегенін жеткізді.
Өнеркәсіп министрлігінің басшысы "АрселорМиттал Теміртау" жұмыс істеп тұрған кәсіпорын екенін және 2022 жылы табысы үш миллион доллардан асқанын атап өтті.
"Бұл өзін-өзі қамтамасыз ету үшін табыс табуды жалғастырып жатқан кәсіпорын. Сондықтан біз кәсіпорынды ұстау үшін бюджет қаржысы жұмсалады деп айту дұрыс емес деп санаймын", - деді Шарлапаев.
Өнеркәсіп министрі сонымен бірге Үкімет АМТ-мен кәсіпорынды беру туралы ұзақ уақыт бойы келіссөздер жүргізгенін айтты. Сондықтан 46 кеншінің өмірін қиған қайғылы оқиғадан кейін кәсіпорынды мемлекеттік меншігіне өткізу туралы шешім қабылданды.
Еске салайық, 28 қазанға қараған түні «АрселорМиттал Теміртау» кенішінде жарылыс болды. Жарылыс кезінде шахтада 252 адам болған, 206 кенші жер бетіне шықты, қалғандары жер астында қалып қойды.
Қазақстан президенті Тоқаев «АрселорМиттал Теміртаумен» ынтымақтастықты тоқтатуды бұйырды. Қайғылы оқиға бойынша сотқа дейінгі тергеу басталды.
Сондай-ақ, үкіметтің «АрселорМиттал Теміртау» АҚ акционерлерімен алдын ала келісімге келгені және кәсіпорынды Қазақстанның пайдасына меншік құқығына беру жөніндегі мәміленің аяқталып жатқаны хабарланды.
Қарағанды облысына барып, марқұм кеншілердің туыстарымен кездескен Тоқаев 29 қазанды жалпыұлттық аза тұту күні деп жариялады. Сонымен қатар, президент «АрселорМиттал Теміртау» біздің тарихымыздағы ең нашар компания екенін атап өтті.
Қайғылы оқиғадан соң Қазақстанда "АрселорМиттал Теміртау" АҚ инвесторы Лакшми Миттал мен басқарушы Палаватху Кришнанды "қызметкерлердің қауіпсіздігін қамтамасыз етудегі қасақана әрекетсіздігі" үшін қылмыстық жауапкершілікке тартуды талап ететін петицияға қол жинау басталды.
Белгілі экономист, 2022 жылы президенттікке үміткер болған Мейрам Қажыкен билік Костенко шахтасындағы апатқа бар кінәні "АрселорМиттал Теміртау" компаниясының акционері Лакшми Митталға жауып отырғанын, ал шын мәнінде кеншілердің өліміне 90% үкіметтің өзі кінәлі екенін мәлімдеді. Алайда премьер-министр Әлихан Смайылов үкіметті ақтап, жауапкершілікті кәсіпорын басшылығына ысырды.
