Желіде бұрынғы премьер-министр Бақытжан Сағынтаевтың бұрынғы күйеу баласы, қазақстандық олигарх Бақыт Ибрагимнің қайтыс болғаны туралы ақпарат тараған. Алматы полиция департаменті ақпаратты растады, деп хабарлайды Ulysmedia.kz.
Алматы полиция департаменті “өз-өзіне қол салуға жеткізу” бабы бойынша қылмыстық іс қозғалғанын хабарлайды. Тиісті сараптамалар тағайындалған.
Ол 2024 жылдың ақпанында түрмеден босап шыққан. 2018 жылы Германияда ұсталып, Қазақстанға экстрадицияланған.
2020 жылдың қараша айында Бақыт Ибрагим, банкир Жомарт Ерсаев және Bank RBK экс-қызметкерлері 144 млрд теңге жымқырғаны үшін кінәлі деп танылды. Бақыт Ибрагим бастапқыда сегіз жылға бас бостандығынан айырылды, бірақ апелляциялық сот оның мерзімін жеті жылға дейін қысқартты.
Бақыт Ибрагим – Buro 24/7 Kazakhstan сән туралы онлайн-басылымының негізін қалаушы Бақытжан Сағынтаевтың үлкен қызы Меруерт Әбдірдің бұрынғы күйеуі. Бұрынғы премьердің Надира Арапова деген тағы бір қызы бар.
2023 жылы Бақыт Ибрагим мен Жомарт Ерсаевтың бұрынғы "RBK bank" СЕО-дан тәркіленген мүліктің толық тізімі мен олардың құны жарияланған еді.
