Париж Олимпиадасының чемпионы Елдос Сметовке туған-туыстарының ортасында "Алла қарсыластарымның мысын басып, кішкентай қылып көрсетіп қойды" деп сөйлеген сөзіне байланысты сұрақ қойылды, деп хабарлады Ulysmedia.kz.
Сметовтың желіде талқыланған сөзі
Бұған дейін Елдос Сметовтің дұға-тілек туралы айтқан сөздері әлеуметтік желіде тараған еді. Дзюдошы жарыс жолында жолы болғаны дұғаның арқасында екенін айтады.
– Олимпиадада дұғаның қабыл болғанын сезіндім. Қарсыластарым көзіме кішкентай болып көрінді. Мен оларды ұстағанда оңай жеңіп алатындай көрініп тұрды. Алла сонда анау қарсыластарымның мысын басып қойды. Сондықтан біз үшін дұға жасаған ата-анамызға Алла разы болсын. Ата-ананың қадірін түсінген адамға Алланың разылығын алу қиын емес», - дейді Елдос Сметов.
Әлеуметтік желіде Елдос Сметовтың бұл сөзі көп талқыланып, оның діни бағыттағы сөзі сынға ұшыраған болатын.
Мұның бәрін көріп-біліп отырған шығарсыз?
Бүгінгі баспасөз мәслихаты барысында Елдос Сметовтен журналистердің бірі “осы сөзіңізді сынағандар болды, бәрін көріп-біліп отырған шығарсыз, не дейсіз?” деп сұрады.
– Бұл жерде бір жаман дүние айтылмаған сияқты. Уағыз форматында айтылған нәрсе емес, басымнан өткен нәрсе. Әсерімді бөлістім. Арнайы бір адамдарды жинап, сұхбат беріп, уағыз айту мақсатын көздеген жоқпын. Жақындарым арасында қуанышымды бөлістім, осы жолға қалай жеткенімді айттым. Бірақ ол нәрсе еш жаман тәрбие деп ойламаймын. Басқа біреулердің шашын бояп, құлағын тесіп жүргеннен қарағанда осындай әңгіме көп болғаны дұрыс деп ойлаймын.
Елдос Сметовтің жеке бапкері Ғалымжан Жылгелдиев де бұдан хабардар екенін білдірді.
– Біздің батыр ағамыз Талғат Бигелдинов әуеге көтерілген сайын өз дұғаларын күбірлеп айтатыны бар еді. Сол сөзі аңыз ретінде айтылады. Ол кісі қанша ұшса да, аман-есен ұшып келген дұға айтып. Елдостың да күресі жақсы болды. Осындай дәрежеге жеткені сол деп ойлаймын. Әр адамның күш-қуат беретін дұғасы болады. Жақсы нәрсені айтқан жақсы ғой, – деді ол.
Елдос Сметов 60 келіге дейінгі салмақта Париж Олимпиадасының чемпионы болды. Ол финалда француз балуанын жеңіп, спорттық мансабындағы Олимпиада жүлделерінің қола және күміс медалімен қатар алтын медаліне ие болды.
Елдос Сметов
Елдос Бақтыбайұлы Сметов (9 қыркүйек 1992 жыл, Тараз, Жамбыл облысы) – қазақстандық дзюдошы, халықаралық дәрежедегі спорт шебері. Рио де Жанейрода өткен ХХХІ жазғы Олимпиадасының күміс жүлдегері, Токио Олимпиадасының қола жүлдегері, Әлем чемпионы (Астана, 2015 жыл), жастар арасындағы Әлем Чемпионы (2010 жыл), Азия Чемпионы (Ташкент, 2016 жыл), Халықаралық «Grand Prix» турнирінің үш дүркін жеңімпазы, Жастар арасындағы Азия чемпионатының қола жүлдегері (Бангкок, 2013 жыл), Азия ойындарының жеңімпазы (Инчхон, 2014 жыл).
Елдос Әл-Фараби атындағы Қазақ Ұлттық университетінде биология және биотехнология факультетінде оқыған. 1998 жылы 6 жасында Алматыда өткізілген республикалық турнирдан өзінің алғашқы жеңісіне ие болды. Кейін Елдос Сметов Астанадағы және Алматыдағы спорт интернаттарында оқыған.
