Жамбыл облысы аумағындағы "Меркі - Шу - Бурылбайтал" республикалық маңызы бар автожолының 40-шақырымында жол-көлік оқиғасы болып, алты адам қаза тапты деп хабарлайды Ulysmedia.kz.
Қайғылы оқиға туралы ҚР Ішкі істер министрлігінің баспасөз қызметі хабарлады.
ОҚИҒАНЫҢ МӘН-ЖАЙЫ
2024 жылдың 17 тамызында сағат 01:00 шамасында "Меркі - Шу - Бурылбайтал" республикалық маңызы бар автожолының 40-шақырымында ауыр жол-көлік оқиғасы болды. 25 жастағы Тойота Альфард автокөлігінің жүргізушісі қарсы жолаққа шығып, Шкода Октавия патрульдік полиция көлігімен соқтығысқан.
АПАТ САЛДАРЫ
Апат салдарынан жол қауіпсіздігін қамтамасыз ету үшін жүрген қызметтік көліктегі екі патрульдік полиция қызметкері қаза тапты. Қайтыс болған полиция қызметкерлерінің бірі 11 бала тәрбиелеп отырған көп балалы әке.
Тойота Альфард көлігінде 8 жолаушы болған. Олардың төртеуі сол жерде қаза тауып, үш жолаушы мен жүргізуші әртүрлі дәрежедегі дене жарақаттарымен аудандық орталық ауруханаға жатқызылды.
ТЕРГЕУ
“Аталған дерек бойынша ҚР ҚК 345-бабы 4-бөлігімен сотқа дейінгі тергеу басталды. Қайғылы оқиғада қаза тапқандардың отбасылары мен жақындарына қайғырып, көңіл айтамыз. Полиция мұқият тергеу жүргізіп, оқиғаның мән-жайын анықтау бойынша барлық қажетті шараларды қабылдап жатыр,” делінген ведомство хабарламасында.
