Екібастұзда көпқабатты үйдің ауласында мектеп жасындағы баланы көлік қағып, ол оқиға орнында көз жұмды. Жол апаты 19 қыркүйек кешке 8-ықшамаудан аумағында болған, деп хабарлайды Ulysmedia.kz.
Туыстары куәгерлерді іздеп жатыр
Қайғылы жағдай туралы марқұм баланың туыстары хабарлаған. Олардың айтуынша, жол апатына екі қыздың қатысы бар. Алайда оқиғаның нақты мән-жайы мен тараптардың кінә дәрежесін тергеу анықтайды.
Марқұмның Жансая есімді әпкесі оқиға куәгерлеріне үндеу жасап, апаттың қалай болғанын анықтауға көмектесуді сұрады.
Ол сол маңда болған адамдардан хабарласып, көлік видеотіркегіштеріндегі, бейнебақылау камераларындағы немесе телефонға түсірілген жазбаларды беруді өтінді.
- Бүгін, 19 қыркүйекте, шамамен сағат 20:00-де 8-ықшамауданда, Әуезов көшесі, 93-үйдің маңында жол апаты болып, інімді көлік қағып кетті. Қазір бізге оқиға куәгерлері өте қажет. Егер сол маңда болсаңыз, апат болған сәтті көрсеңіз немесе видеотіркегіште не камерада жазбаңыз болса, өтінемін, маған хабарласыңыздаршы, - деп жазды ол.
Туыстарының сөзінше, екінші тарап өз кінәсін мойындамай отыр. Олар куәгерлердің жазбалары оқиғаның нақты қалай болғанын анықтауға көмектеседі деп үміттенеді.
Полиция не дейді?
Полиция департаменті кәмелетке толмаған баланың қаза болуына қатысты қылмыстық іс қозғалғанын хабарлады.
- Оқиғаның мән-жайы мен себептері тергеу барысында анықталады, - деп мәлімдеді ведомство.
Полиция жол қозғалысына қатысушыларға жол ережесін және белгіленген жылдамдықты қатаң сақтау керегін де ескертті.
