Халықаралық Global Witness ұйымының жыл сайынғы есебіне сәйкес, 2023 жылы әлемде кем дегенде 196 экологиялық белсенді қаза тапты, деп хабарлайды Ulysmedia.kz.
Қылмыстардың басым көпшілігі Латын Америкасында тіркелген. Дәлірек айтқанда 70 пайыздан астамы Колумбия, Бразилия, Мексика және Гондурас сияқты Латын Америкасы елдерінде болды. Мысалы былтыр Колумбияда өз экожүйелерін корпорациялардың жойқын әрекеттерінен және жерді басып алу жөніндегі заңсыз әрекеттерден қорғауға тырысқан 79 адам қаза тапқан.
Баяндамада барлық құрбандардың 43 пайызын құрайтын жергілікті халықтардың өкілдеріне ерекше назар аударылған. Бұл қауымдастықтар көбінесе тау-кен өнеркәсібінің және олардың аумақтары мен табиғи ресурстарына қол жеткізуге ұмтылатын басқа салалардың агрессиясына тап болған.
Экобелсенділерге қауіп төніп тұр
Климаттық дағдарыстың күшеюімен табиғатты қорғауды жақтайтын адамдар зорлық-зомбылықтың құрбаны бола бастады.
"Климаттық дағдарыс күшейген сайын, біздің планетамызды батыл қорғау үшін өз дауыстарын пайдаланатындар зорлық-зомбылыққа, қорқытуға және кісі өлтіруге тап болады. Біздің деректеріміз кісі өлтіру саны әлі де жоғары екенін көрсетеді,"- дейді Global Witness өкілі Лаура Фуронес.
Экоактивистерді қорғауға шақыру
Global Witness ұйымы әлемдік билік пен бизнесті экологиялық наразылықтар үшін қауіпсіз орта құруға шақырады. Баяндамада белсенділерге жасалған шабуылдардың барлық жағдайларын мұқият құжаттау, сондай-ақ олардың құқықтық және физикалық қорғалуын қамтамасыз ету талабы қамтылған.
