Сыбайлас жемқорлыққа қарсы іс-қимыл агенттігінің ресми өкілі Данияр Бекайдаров Іле ауданының әкімі Бағдат Қарасаевтың ісі жөнінде толығырақ ақпаратты жариялады. Тергеуге ілінген әкім аймаққа 204 млн теңгеге залал келтіріп, басқа да лауазымды тұлғаларды қылмыстық схемаға тартты деген күдікке ілінген, деп хабарлайды Ulysmedia.kz.
ӘКІМ НЕ ҮШІН КҮДІККЕ ІЛІНДІ
Бағдат Қарасаев өзіне аффилиирленген компаниясына қатты тұрмыстық қалдықтар полигонын сенімгерлік басқару құқығын беру арқылы өрт қауіпсіздігі талаптарын бұза отырып, санитарлық-эпидемиялық бақылау органдарының рұқсатынсыз лауазымдық өкілеттіктерін теріс пайдаланды деген күдікке ілінген.
Сонымен қатар, ол полигонды сенімгерлік басқару мерзімін заңсыз ұзарту арқылы өзінің лауазымдық өкілеттігін асыра пайдаланды деген күдік бойынша тергеліп жатыр.
ОЛ ҚЫЛМЫСТЫҚ СХЕМАҒА КІМДЕРДІ ТАРТТЫ
Бекайдаровтың айтуынша, қылмыстық схемаға Қарасаев аудандық қаржы және тұрғын үй-коммуналдық шаруашылық бөлімдерінің басшыларын тартқан.
Компанияның тұрмыстық қатты қалдықтарды кәдеге жарату бойынша шартта көзделген міндеттемелері орындалмаған.
– Оның қызметінен түскен табыс оны жеке байытуға бағытталған, – деді Антикор өкілі.
Құқыққа қарсы іс-қимылдар салдарынан Алматы облысының экологиясына 204 млн теңге көлемінде залал келтірілген. Соттың санкциясымен күдікті қамауға алынып, сотқа дейінгі тергеу жалғасуып жатыр.
Еске сала кетейік, 4 қыркүйек күні Алматы облысы Іле ауданының әкімі Бағдат Қарасаевтың лауазымдық өкілеттіктерін асыра пайдаланғаны және билікті немесе лауазымдық өкілеттіктерді асыра пайдаланғаны үшін Антикорды ұстағаны белгілі болған еді.
4 қыркүйекте Алматы облысының прокуратурасында Алматы облысының Іле ауданының әкімі Бағдат Қарасаев қоқыс полигонын тексергеннен кейін ұсталғаны айтылды.
