Шәкір Кейкин Атырау қаласының әкімі қызметінен кетті. Бұл ақпаратты Ulysmedia.kz порталына облыс әкімдігі растады. Айта кетейік, шенеунік екі орынбасарына қатысты қылмыстық істер аясындағы оқиғалардан кейін қызметінен кетті.
Толығырақ
Шәкір Кейкиннің қызметтен кету себебі айтылған жоқ. Атырау облысы әкімдігі редакция сауалына қысқа ғана жауап берген.
– Растаймыз, – деп хабарлады әкімдік.
Шенеунік қаланы 2023 жылғы 10 шілдеден бері басқарды. Атыраудың жаңа әкімі кім болатыны әзірше ресми түрде жарияланған жоқ.
Бірнеше даудың ортасында қалды
Кейкиннің қызметтен кетуі кейінгі айларда болған оқиғалар аясында ерекше назар аудартады. Шілдеде Ұлттық қауіпсіздік комитетінің қызметкерлері оның орынбасары Тілек Махуовты ұстады. Ол 100 млн теңге көлемінде пара алды деген күдікке ілінді.
Тағы бір орынбасары Мейіржан Мұқасов сыбайлас жемқорлық ісі бойынша жауап алынды. Кейін ол босатылды. Бұл іс бойынша Кейкиннің өзі де жауап алуға шақырылған. Алайда оған ешқандай айып тағылған жоқ.
Редакция бұған дейін осы оқиғаларға және облыс басшылығының ауысқанына қарамастан, Кейкиннің қала әкімі қызметін жалғастырғанын жазған еді.
Оның үш жылға жуық қызметі кезінде Атырауда көгершіндерге қатысты дау, «Үш кербез» ескерткішін көшіру, канадалық шыршалар, жағалаудың жағдайы және басқа да қалалық мәселелер бойынша пікірталастар болды.
Айта кетейік, шілдеде Атырау облысының әкімі де ауысты. Серік Шәпкеновтің орнына өңірді бұрынғы энергетика министрі Болат Ақшолақов басқарды.
