Павлодар облысында 16 жылын психоневрологиялық орталықта өткізген 34 жастағы әйел үйіне шығарылды, деп хабарлайды Ulysmedia.kz.
ИНТЕРНАТТА ТӘРБИЕЛЕНГЕН
Бұл пациентті Мичурин психоневрологиялық орталығының басқа пациенттерінің арасынан Павлодар прокурорлары тексеру кезінде анықтаған. Белгілі болғандай, павлодарлық әйел 18 жасқа дейін ақыл-есі кем балаларға арналған интернатта тәрбиеленген.
«1990 жылы туған қыз 2008 жылы сот шешімімен Мичурин психоневрологиялық орталығына орналастырылған. Ол 16 жыл бойы осы мекеменің қамқорлығында болып, сонда тұрған. Биылғы тексеру кезінде біз психиатрларды тартып, орталық қамқорлығындағы адамдарды сұхбаттан өткіздік. Сұхбат нәтижесінде бұл қыздың ақыл-есі дұрыс екені, өз әрекеттері үшін жауап бере алатыны анықталды», – деді Павлодар ауданының прокуроры Ермек Ахметов.
СОТ ҚАБІЛЕТТІ ДЕП ТАНЫДЫ
Қадағалаушы органдардың арызы бойынша сот психиатриялық сараптама тағайындаған.
«Сараптама қыздың қабілетті екенін растады, сот оны қабілетті деп таныды. Сот шешімі заңды күшіне енді», – деді Ахметов.
ДЕНСАУЛЫҒЫ ТҮЗЕЛГЕНІН БАЙҚАМАЙ ҚАЛҒАН
Прокуратураның мәліметі бойынша, сарапшылар павлодарлық әйелдің жеңіл дәрежедегі ақыл-ой кемістігін растады, ал психоневрологиялық орталықта оған әлдеқайда ауыр диагноз қойылған. Павлодарлық әйелдің қашаннан бастап мекеме қызметкерлерінің көмегіне мұқтаж болмағаны белгісіз.
«Орталық қызметкерлері қамқорлықтағы адамның жағдайы жақсарып жатқанын елемей қалды. Денсаулығы түзелген. Қамқорлықтағы адам өзі сотқа барып, қабілетті екенін дәлелдей алмайды, оны қамқоршысы, бұл жағдайда мемлекеттік мекеме істеуі керек. Бірақ олар олай жасамады. Қазір қыздың қамқорлығы тоқтатылды. Қабілетті адамды психоневрологиялық орталықта ұстағаны үшін алты адамға, соның ішінде орталықтың директор орынбасарына, дәрігерлер мен медперсоналға тәртіптік жаза берілді», – деді Павлодар ауданының прокуроры Ермек Ахметов.
Павлодар облысы жұмыспен қамтуды үйлестіру және әлеуметтік бағдарламалар басқармасы прокурорлардың мәлімдемесімен келіспейді. Басқарма қызметкерлері павлодарлық әйелдің конституциялық құқықтарын қалпына келтірдік деген прокурорлардың ресми хабарламасын дұрыс емес деп есептейді.
«Мұнда дұрыс түсіндірме берілмеген. Біз қазір бұл шешімге қарсылық білдіреміз, өйткені қабілетсіздікті орталық анықтамайды, оны сот шешеді», – деді Павлодар облысы жұмыспен қамтуды үйлестіру және әлеуметтік бағдарламалар басқармасының басшысы Альмира Дисюпова.
ТУЫСТАРЫМЕН ТҰРЫП ЖАТЫР
Айта кетейік, прокуратураның мәліметі бойынша, әйелдің үшінші топтағы мүгедектігі бар. Ол өз үйіне шығарылғаны туралы жаңалықты қуанышпен қабылдап, қазір алыс туыстарымен бірге тұрып жатыр.
ӨЗГЕ ДЕ НАУҚАСТАР ТУРАЛЫ
Павлодар облысы прокуратурасының мәліметінше, Мичурин психоневрологиялық орталығында 540 адам бар, прокурорлық тексеріс жалғасуда.
Бұған дейін Денсаулық сақтау министрлігі психикалық аурулармен ауыратын қазақстандықтардың саны 200 мыңдай болатынын айтқан.
