Дәрігерлер қауымдастығы қылмыстық схема ұйымдастырып, жаңа туған нәрестелерді жедел жәрдем бөлімшелерінің орнына жеке клиникаларға бағыттап, осылайша, заңсыз табыс тапқан, деп хабарлайды Ulysmedia.kz.
21 БАЛА ҚАЙТЫС БОЛҒАН
Hürriyet газетінің жазуынша, қылмыстық әрекет салдарынан кем дегенде 21 бала қайтыс болған.
Күдіктілердің мақсаты балалардың жағдайын жақсарту емес, барынша пайда табу болды, – делінген басылым жазбасында.
ҚЫЛМЫСҚА ҚАТЫСЫ БАР 19 КЛИНИКА АНЫҚТАЛҒАН
Белгілі болғандай, қылмыстық схеманың мәні мынада: қаскөйлер ата-аналарды жаңа туған нәрестесін өзара келісіп алған жеке клиникаларға жіберуге көндіреді. Бұл ретте оларға қызмет көрсету құны мемлекеттік қызметке қарағанда жоғары болды.
Прокуратура осындай 19 клиниканы анықтады. Бұл медициналық мекемелерде жаңа туған нәрестелер тиісті деңгейде көмек ала алмай инфекция жұқтырған. Жаңа туған нәрестелерге күтім жасауды көбіне біліктілігі жоқ медбикелер жасаған. Сондай-ақ ата-аналардан ұзақ уақыт стационарлық күтім мен дәрі-дәрмек үшін ақша талап еткен. Тергеушілер мұны өлім тудырушы факторлардың бірі ретінде қарастырады.
41 АДАМ ҰСТАЛЫП, 22-СІ ҚАМАУҒА АЛЫНҒАН
Түркия Денсаулық сақтау министрлігінің басшысы Кемал Мемишоглу прокуратура жаңа туған нәрестелер ісін тергеу аясында 10 клиника жабылғанын хабарлаған.
Оның айтуынша, әзірге 22 адам қамауға алынған.
Анадолу агенттігі прокурорлар сотқа 10 жылдан 589 жылға дейін бас бостандығынан айырылуы мүмкін 47 адамға қатысты айыптау қорытындысын бергенін хабарлады.
Денсаулық сақтау министрінің айтуынша, түрік билігі перзентханалардағы алаяқтық туралы алғашқы сигналды 2023 жылдың наурыз айында алған.
Біз қатаң құпияда жұмыс істедік, клиникаларға сәбилерді жібермеуге тырыстық. Біздің прокурорлар тергеуге көп уақыт жұмсады. 2024 жылдың 26 сәуірінде бұл бандаға қарсы операция жүргізілді. Нәтижесінде 41 адам ұсталды, олардың 22-сі қамауға алынды. Бүгін біз 10 аурухананы жаптық, – деді Мемишоғлу.
19 қазанда Мемишоғлу мен Әділет министрлігінің басшысы Йылмаз Тунчты Түркия президенті Режеп Тайып Ердоған қабылдады.
Жергілікті БАҚ хабарлағандай, президент олардан жанжалдың егжей-тегжейін анықтап, жасалған қылмыстың барлық кінәлілерін табу үшін жан-жақты тергеу жүргізуді тапсырған. Қылмыстық ұйымға қатысушыларға түрік Қылмыстық кодексінің бірнеше баптары бойынша: қасақана кісі өлтіру, алаяқтық, қылмыстық ұйым құру, ресми құжаттарды қолдан жасау бойынша айып тағылған.
