Израиль қорғаныс армиясы (ЦАХАЛ) өлтірілген «Хезболла» тобының басшысы Хасан Насралланың Бейруттағы бункерін анықтады, деп хабарлайды Ulysmedia.kz Euronews арнасына сілтеме жасап.
МИЛЛИОН ДОЛЛАР МЕН АЛТЫН ҚҰЙМАЛАР
ЦАХАЛ-дың ресми өкілі Даниэль Хагаридің айтуынша, онда жүздеген миллион доллар мен алтын құймалары сақталған. Бұл орын Ливан астанасының оңтүстігінде орналасқан ауруханалардың бірінің астында болған.
Хагари сондай-ақ Тегеранның «Хезболла» мүшелеріне қаржы жеткізу үшін ақша салынған жүк сөмкелерін ұшақтармен Иранның Бейруттағы елшілігіне жіберіп отырғанын мәлімдеді.
«Хезболланың қаржылық құрылымы екі негізгі кіріс көздеріне негізделген: Иран режимінің ақшасы және Ливан халқының ақшасы. Ирандық "Аль-Кудс" күштері "Хезболлаға" Сирияда сатылатын ирандық мұнайдан түсетін қаражатты аударып отыр. Сондай-ақ Иран қолма-қол ақша мен алтын толтырылған чемодандарды ұшақтар арқылы Бейруттағы елшілікке жіберіп, оны тікелей "Хезболлаға" жібереді», - деді Хагари.
Ол Израиль әскери-әуе күштері аурухананы шабуылдауды жоспарламайтынын атап өтті. 20 қазанда Израиль армиясы «Хезболла» қаржылық нысандарына қарсы шабуылдар толқыны болатынын хабарлады.
ЦАХАЛ ШАБУЫЛДАРЫ
Дүйсенбі күні ЦАХАЛ Бейруттің оңтүстік бөлігіндегі «Кард аль-Хасан» компаниясының ғимараттарына әуе соққыларын жасады. Израиль әскері бұл компания «Хезболланың» террористік операцияларын қаржыландырады деп мәлімдеді.
ХАЛЫҚАРАЛЫҚ АГЕНТТІКТЕР НЕ ДЕЙДІ
Сонымен бірге «Сахель» клиникасының директоры Фади Аламех Израильді жалған айыптауда деп кінәлап, Ливан армиясын ауруханаға кіріп, онда тек операциялық бөлмелер мен мәйітхана бар екенін растауға шақырды, деп хабарлайды Reuters.
Агенттік Хагаридің сөздерін өз бетінше тексере алмады, ол Израиль барлауы бұл ақпаратты бірнеше жыл бойы жинағанын айтқан.
