Қаржы нарығын реттеу және дамыту агенттігінің (АРРФР) мәліметі бойынша, қазақстандықтар ипотекалық несиелерге жиі жүгіне бастаған. Бар болғаны бір жыл ішінде несие сомасы 42,5%-ға артқан, деп хабарлайды Ulysmedia.kz.
ИПОТЕКА
Жыл басынан бері нарықтық шарттармен 498,2 млрд теңге сомасына, ал жеңілдетілген шарттармен 875,8 млрд теңге сомасына ипотекалық несие берілген. Қыркүйек айының қорытындысы бойынша банктердің ипотекалық портфелі 1,2%-ға өсіп, 5,8 трлн теңгеге жетті.
2024 жылдың 9 айында жаңа ипотекалық несиелердің көлемі шамамен 1,4 трлн теңгені құрап, 2023 жылдың сәйкес кезеңімен салыстырғанда 17%-ға артты.
НЕСИЕ МӨЛШЕРЛЕМЕСІ
2024 жылдың қыркүйек айында халыққа берілетін несиелер бойынша орташа мөлшерлеме 20,1%-ға дейін өсті (2024 жылдың тамыз айында – 19,0%). Бұл тұтынушылық несиелер бойынша мөлшерлемелердің 19,7%-дан 20,6%-ға дейін өсуімен байланысты.
2024 жылдың қыркүйек айының соңында халыққа берілген несиелер көлемі 19,5 трлн теңгені құрап, өткен аймен салыстырғанда 1,5%-ға, ал жыл басынан бері 16,6%-ға өсті. Банк портфеліндегі тұтынушылық несиелер 1,6%-ға ұлғайып, 12,9 трлн теңгеге жетті.
ЭКОНОМИКАҒА АРНАЛҒАН НЕСИЕЛЕР
Екінші деңгейлі банктердің экономикаға берген несиелері 2024 жылдың қыркүйегінде 1,2%-ға өсіп, 31,5 трлн теңгеге жетті, бұл жыл басынан бері 12,9%-ға артқанын көрсетеді. Ұлттық валютадағы несиелер 1,1%-ға өсіп, 28,8 трлн теңгеге жетті, ал валюталық несиелер 2,4%-ға ұлғайып, 2,7 трлн теңгені құрады.
