Қазақстан қор биржасындағы сауда нәтижесінде доллар бағамы белгілі болды, деп хабарлайды Ulysmedia.kz
Қазақстан қор биржасындағы (KASE) күндізгі сауда нәтижесінде доллардың орташа өлшемді бағамы 497,89 теңгені құрап, көрсеткіш 1,88 теңгеге өсті.
Алматыдағы айырбастау орындарында долларды орташа 499 теңгеге сатып алып, 500,2 теңгеге сатуда. Астанада долларды орташа 497 теңгеге сатып алып, 500,1 теңгеге сатуда.
Доллардың ең жоғары бағамы Семей қаласында тіркелген, онда валюта құны 505 теңгеге жетті. Орал қаласында доллар 502 теңгеден саудаланады.
Ақтөбеде бағам 501 теңге деңгейінде қалып отыр.
Шымкент, Қостанай, Павлодар және Риддер қалаларында долларды 499,5 теңгеге сатып алуға болады.
Соңғы күндері доллар бағамы 500 теңгеге жақындап қалған, қазір бұл психологиялық тосқауыл көптеген қалада еңсерілген.
Өткен аптаның соңында шетел валютасына сұраныс оның ұсынысынан едәуір басым болды.
Ұлттық банк басшысы Тимур Сулейменов доллардың 500 теңге деңгейіне жетуі психологиялық шек екенін айтады.
“Естеріңізде болса, доллар бағамы 300-ден 400-ге жеткенде айтарлықтай өзгеріс болды ма? Немесе 390-нан 402-ге көтерілгенде, аспан айналып жерге түсті ме? Мен халықтың алаңдаушылығын және психологиялық факторларды түсінемін. Бірақ валюта бағамы экономиканың күшіне байланысты. Валюта — бұл мемлекеттің ақша бірлігі. Бізде теңгенің айтарлықтай әлсіреуіне негіз жоқ, бірақ шағын ауытқулар болуы мүмкін. Егер нарық принциптерінен ауытқу байқасақ және біреу теңгеге қарсы 'ойнаса', онда біз сөз жүзінен іс жүзіндегі монетарлық интервенцияға көшеміз” деген Тимур Сүлейменов.
Кейбір сарапшылардың пікірінше, жақын арада доллар бағамы 500 теңгеден төмен түспейді және олар девальвацияға алғышарттар бар екенін жасырмайды.
Бұл жағдай валюта бағамы мен экономикалық тұрақтылық арасындағы байланысты көрсетеді, ал сарапшылар мен мемлекеттік органдар алдағы өзгерістерге дайындықтарын білдіруде.
