Грузияның премьер-министрі Ираклий Кобахидзе "Грузин арманы" партиясының кеңсесінде өткен брифингте Грузияның 2028 жылдың соңына дейін Еуропалық Одақпен (ЕО) келіссөздерді бастамайтынын және ЕО бюджеттік гранттарынан бас тартатынын мәлімдеді, деп хабарлайды Ulysmedia.kz.
ШЕШІМНІҢ МӘНІ
«Біз бүгін ЕО-мен келіссөздерді 2028 жылдың соңына дейін күн тәртібіне қоймау туралы шешім қабылдадық. Сондай-ақ, ЕО-ның кез келген бюджеттік гранттарынан бас тартамыз. 2028 жылдың соңы – Грузияның 2030 жылы ЕО-ға қосылу есігін ашуға экономикалық тұрғыдан лайықты дайын болатын уақыты», – деді Кобахидзе.
Премьер-министр ЕО-мен интеграцияны "қайыр сұрау" ретінде қарастыруға болмайтынын баса айтты. Ол Грузияның бай мәдениеті мен әлеуеті ЕО-ны байыта алатынын және керісінше ЕО-ның Грузия үшін де пайдалы болатынын атап өтті.
ЕО-МЕН ҚАРЫМ-ҚАТЫНАС ЖӘНЕ БОПСА МӘСЕЛЕСІ
Кобахидзенің айтуынша, Еуропарламент Грузияға қарсы шантаж құралына айналған. Соңғы үш жылда Еуропарламент Грузия туралы бес резолюция қабылдаған, олар премьердің пікірінше, жалған ақпаратқа және қорлау толы.
«Еуропалық саясаткерлер мен шенеуніктер ЕО гранттары мен несиелерін Грузияны бопса жасау құралы ретінде пайдаланып келді. Бұл, әсіресе, кандидаттық мәртебе мәселесімен байланысты болды. Соғыс жағдайында біздің бейбітшілікке мұқтаж болған уақытымызда, кейбір еуропалық шенеуніктер қоғамды бөліп-жарып, елде революция ұйымдастыруға тырысты», – деді ол.
Кобахидзе кандидаттық мәртебе мәселесінің қоғамда радикализм мен поляризацияны арттырғанын айтты. Енді келіссөздерді бастау идеясы да осындай мақсаттарға пайдаланылып жатқанын жеткізді.
Премьер-министр келіссөздерді бастау мен ЕО-ға мүше болу арасында тек бір жарым-екі жыл қажет екенін, ал 2030 жылға дейін ЕО шығысқа қарай кеңеюді жоспарламағанын мәлімдеді. Сондықтан Грузия келіссөздерге дайын болмайынша, бұл процесті бастау дұрыс емес деп санайды.
Кобахидзе Грузия 2028 жылға дейін ЕО міндеттемелерінің 90%-дан астамын өз қаржысы есебінен орындайтынын айтты. Бұл Грузияның ЕО-ға қайыршы сияқты емес, мықты экономикасы бар ел ретінде қосылуға ниетті екенін көрсетеді.
Кобахидзе бұл шешім Грузия мен ЕО арасындағы қарым-қатынастарды жақсартуға үлес қосады деп үміттенеді. Ол еуропалық шенеуніктерді Грузиямен шантаж және қорлаудан бас тартып, құрметпен сөйлесуге шақырды.
«Біз ЕО-ға қарай ілгерілеуді жалғастырамыз, бірақ бізді бопсалау және манипуляция жасау әрекеттеріне жол бермейміз. Бұл шешім ЕО-ның Грузиядағы беделіне келтірілетін зиянның алдын алады», – деп мәлімдеді Ираклий Кобахидзе.
ГРУЗИЯДАҒЫ ПАРЛАМЕНТ САЙЛАУЫ
Грузияда таяуда өткен парламент сайлауында проресейлік “Грузин арманы" партиясы 54 пайыз дауыс жинап, 150 орыннан 89-ына ие болған. Оппозициялық партиялар "Өзгерістер коалициясы" 19 депутат мандатын, "Біртұтас ұлттық қозғалыс" – 16, "Күшті Грузия" – 14, "Грузия үшін" – 12 мандат алған. Оппозиция саулау нәтижесін мойындамай, парламент сайлауын қайта өткізуді талап етіп, наразылық акцияларын өткізген.
