Алаяқтар әншінің дауысын салып, ақша жинап жүр, деп хабарлайды Ulysmedia.kz.
Димаштың жанкүйерлерінің парақшасында оқырмандарға ескерту жарияланды. Жақында интернетте Димаштың дауысы мен бейнесі жасанды интеллект технологиялары арқылы жасалған бейнероликтер пайда бола бастадан.
– Мұндай бейнероликтер алаяқтардың қолынан шыққандығын және әртіске еш қатысы жоқ екенін атап өткіміз келеді. Димаш ешқашан өз жанкүйерлерін қаржылық алаяқтыққа қатысуға немесе күмәнді жобаларға ақша салуға шақырған емес және шақырмайды да. Мұқият және сақ болуларыңызды өтініп сұраймыз. Мұндай зиян келтіруі мүмкін бейнелер мен хабарларға сенбеңіздер! Алаяқтардың құрбаны болмау үшін үнемі ақпаратты тексеріп, күмәнді әрекеттерге бармауға шақырамыз. Барлық сенімді ақпарат тек Димаш пен оның командасының ресми платформаларында жарияланады, – делінген хабарламада.
Әлемге әйгілі әнші Димаш Құдайберген бұған дейін Дубайдан сәлем жолдап, күні кеше алған марапатын рухани ұстазы – биыл 95 жасқа толып отырған бұлбұл әнші Бибігүл Төлегенованың құрметіне арнаған еді. Димаш күні кеше беделді DIAFA жүлдесінің иегері атанған болатын.
DIAFA (Distinctive International Arab Festivals Awards) — Дубайда жыл сайын өткізілетін халықаралық премия. Ол өнер, мәдениет, бизнес және гуманитарлық жұмыстарға қосқан үлестері үшін әртүрлі елдердің көрнекті тұлғаларын атап өтеді. Лауреаттар жетістіктері мен халықаралық сахнадағы ықпалы үшін таңдалады.
