Үкімет басшысының орынбасары - ұлттық экономика министрі Нұрлан Байбазаров Үкіметтің әртүрлі даму сценарийі бойынша іс-қимыл жоспары бар екенін атап өтті. Алайда доллары 600 теңгеден асқан жағдайда Үкімет не істейтінін айта алмады, деп хабарлайды Ulysmedia.kz.
– Біз негізгі сценарий бойынша доллардың орташа жылдық деңгейін 470 теңге деңгейінде белгіледік. Бізде 500 дегендегі есептеулер бар. Біз бұл есептеулерді жағдайға байланысты жасай аламыз. А, В жоспарлары бар, - деді Байбазаров.
600 теңгелік доллар бағамын болжайтын жоспарлар туралы сұраққа министр мұндай сценарий болжанбайтынын атап өтті.
– Біз мұндай жоспарды әлі болжап отырған жоқпыз. Біздің болжамдар мен көрсеткіштердің есептеулерін біз В жоспарында бір доллар үшін — 500 теңге деп есептедік, - деп түсіндірді ол.
Қабылданып жатқан шараларға тоқталған Байбазаров Үкіметтің басты міндеті — түрлі бағдарламалар мен жобаларды іске асыру екенін түсіндірді. Осы бастамалар аясында келесі жылы шетелдік инвестициялар ағынын күтеді.
– Осы жобалар аясында біз келесі жылы дәл шетел валютасындағы инвестицияларды енгізуді жоспарлап отырмыз. Бұл инвестициялар біздің валюта нарығымыз арқылы өтеді, айырбасталады. Қазақстанда осы жобаларды іске асыруға жұмсалатын болады. Сондықтан біз өз тарапымыздан валютаға деген сұраныс пен ұсынысты теңестіру үшін осылайша валютаның түсуіне ықпал етеміз, — деп түсіндірді министр.
ДОЛЛАРДЫҢ ҚЫМБАТТАУЫ
28 қарашадағы Қазақстанның айырбастау пункттерінде валюталардың орташа өлшенген бағамы белгілі болды. Доллар 525 теңгеге сатыла бастады. 18 қарашада Қазақстанның айырбастаушыларындағы доллар бағасы 500 теңгеден, ал 26 қарашада 503 теңгеден асқан еді.
Ұлттық банк осыған байланысты интервенция жүргізді.
Артынша Ұлттық банк базалық мөлшерлемені +/- 1 п.т. дәлізімен жылдық 15,25% деңгейінде белгілеу туралы шешім қабылдады.
