Астана қаласының Полиция департаменті электр сымдарын ұрлаумен айналысқан төрт адамнан тұратын қылмыстық топты ұстады. Олар жер асты құдықтарына кәріз люктері арқылы кіріп, түнгі уақытта ұрлық жасағаны анықталды, деп хабарлайды Ulysmedia.kz Астана қалалық ПД баспасөз қызметіне сілтеме жасап.
МӘН-ЖАЙЫ
Өткізу орнын тінту барысында жеті қап тазартылған мыс кабель өнімдері және үш радиостанция табылды. Сондай-ақ, сатып алушыдан электронды және механикалық таразылар тәркіленді. Топ мүшелерінің ұрлықтың бес фактісіне, оның ішінде трансформаторлық қосалқы станциядан мыс шиналарын ұрлауға қатысы бар екені анықталды.
Қазіргі уақытта аталған дерек бойынша қылмыстық іс қозғалды. Күдіктілер қамауға алынды, тергеу амалдары жүргізілуде.
БҰҒАН ДЕЙІН
Еске салсақ, бұған дейін Астананың сол жағалауында жарық қалпына келтірілгенін жазған едік. Сондай-ақ Астананың Есіл ауданындағы бірнеше тұрғын үй кешені мен әкімшілік ғимараттар кабельдің ұрлануына байланысты жарықсыз қалғанын жазған едік.
