Елордада өткен бокс кешінде басты жекпе-жекте қазақстандық Олимпиада чемпионы Данияр Елеусінов пен аргентиналық Хуан Эрнан Леао жартылай орта салмақтағы IBO чемпиондық белбеуін сарапқа салды, деп хабарлайды ulysmedia.kz.
Аргентиналық боксшы 15 кездесу өткізіп, 14-де жеңіске жеткен. 4 жекпе-жекті нокаутпен аяқтаған. Ал Данияр Елеусінов кәсіпқой бокста 10 рет шаршы алаңға шығып, 6-ын уақытынан бұрын аяқтаған.
Данияр кездесуді сенімді бастады. Шаршы алаңда басымдықты алғашқы сәттен-ақ өз қолына алды. Екінші раундтың басында қарсыластың бауырына Данияр жақсы соққы өткізді. Кездесудің тағдыры осы соққымен шешілетіндей көрінген. Аргентиналық алайда шыдап бақты. Алайда Данияр оны тырп еткізген жоқ. Екінші раундттың ортасында Леао тағы ногдаунға түсті. Аргентиналық десе де есін жиып үлгерді. Жекпе-жек үшінші раундқа созылды.
Үшінші раундта Леаоның Даниярға мүлде қарсылас бола алмайтыны тіпті айқындала түсті. Бұрыштан бұрышқа қашып, еш соққы дарыта алмаған аргентиналық қорғанумен ғана болды. Үшінші раундта ол үшінші рет ногдаунға ұшырады.
Төртінші раундта Данияр қысымды жалғастырды. Қазақ боксшысының жылдамдығына аргентиналық үлгере алмай жүрді. Біржақты сабау тағы жалғасты. Жекпе-жек ақыры 12 раундқа дейін созылды. Аргентиналық табандылығын мойындау керек. 12 раунд бойы соққы алғанымен, шыдап шықты. Төрешілердің бір ауыздан берген шешімімен Данияр Елеусінов жеңіске жетті. Елеусінов IBO нұсқасы бойынша әлем чемпионы атанды.
