Құқық қорғау органдары аталған факт бойынша тергеу жүргізіп, тиісті сараптамаларды бекітті, деп хабарлайды Ulysmedia.kz.
Жезқазған қаласында облыс әкімдігі алдындағы алаңда Наурыз мейрамына арналған сахнаны безендіріп жатқан 55 жастағы кәсіпкер биіктен құлап, ауыр жағдайда жансақтау бөліміне жеткізілді. Алайда төрт күннен кейін, операциядан соң, көз жұмды, деп хабарлайды Патриот басылымы.
Наурыз мерекесіне орай безендіру жұмыстарына тартылған жеке кәсіпкер билбордқа мерекелік баннер іліп жатқан кезде үш метрден аса биіктіктен құлап кеткен. Әріптестері дереу жедел жәрдем шақырып, 14 наурызда ол облыстық көпсалалы ауруханаға жеткізілді. Дәрігерлер науқастың өмірі үшін күрескенімен, төртінші күні оның жүрегі тоқтады.
Жезқазған қаласы мәдениет бөлімінің басшысы Гүлзада Шомаева бұл оқиғаның безендіру жұмыстарына қатысы барын жоққа шығарды.
Ол құлаған бойда қайтыс болған жоқ, біраз уақыт ауруханада жатты. Сондықтан оның өлімін алаңдағы жұмыстармен байланыстырмау керек. Біз оны жұмысқа тартпағанбыз. Ол ол жерде не істеп жүргенін білмеймін, – деді Гүлзада Шомаева.
Аталған оқиға бойынша Жезқазған қаласының полиция басқармасы қылмыстық іс қозғады. Қазір тергеу амалдары жүргізіліп, қажетті сараптамалар тағайындалған.
Айта кетейік, 2024 жылдың соңында Семейде жаңа жылдық шыршаны безендіруге мұғалімдер тартылып, салдарынан бір педагог жарақат алған болатын. 23 желтоқсанда Семей қаласының білім бөлімінің басшысы осы жағдайдан кейін қызметінен босатылған еді.
