Алдағы көктемгі шақыру науқаны кезінде әскерге шақырылушылар саны 2011 жылдан бергі ең жоғары деңгейге жетеді. Қағаз жүзіндегі шақыру қағаздарымен қатар, 18-30 жас аралығындағы РФ азаматтарына электронды шақыру қағаздары да жіберілетін болады, деп хабарлайды Ulysmedia.kz.
КӨКТЕМГІ ШАҚЫРУ НАУҚАНЫ БАСТАЛДЫ
2025 жылғы 31 наурызда Ресей Федерациясының президенті Владимир Путин көктемгі шақыру науқаны туралы жарлыққа қол қойды. Құжатқа сәйкес, 1 сәуір мен 15 шілде аралығында Ресей армиясына 160 мың адам шақырылады.
ЭЛЕКТРОНДЫ ШАҚЫРУ ҚАҒАЗДАРЫ ЕНГІЗІЛЕДІ
Осы күні Ресей Федерациясының Қорғаныс министрлігі көктемгі шақыру кезінде азаматтардың "Мемлекеттік қызметтер" порталындағы жеке кабинеттеріне электронды шақыру қағаздары жіберілетінін мәлімдеді. Сонымен қатар, Мәскеу қаласының шақырылушылары "mos.ru" порталынан шақыру қағаздарын алады. Қағаз жүзіндегі шақыру қағаздары әлі де "заңды күшке ие" болып қала береді, деп қосты ведомство.
ШАҚЫРУ ЖАСЫ 18-ДЕН 30-ҒА ДЕЙІН
Жаңа заңдарға сәйкес мерзімді әскери қызметке 18-30 жас аралығындағы Ресей азаматтары шақырылады.
2011 ЖЫЛДАН БЕРГІ ЕҢ ІРІ ШАҚЫРУ НАУҚАНЫ
Алдағы көктемгі шақыру науқаны 2011 жылдан бергі ең ірі шара болады. Сол кезде Қорғаныс министрлігі шақырылушылар санын екі есе қысқартуды шешкен еді. 2024 жылғы көктемгі науқан кезінде 150 мың адам, 2023 жылы – 147 мың адам, ал 2022 жылы – 134,5 мың адам әскерге шақырылған болатын, деп хабарлайды ТАСС.
