Бүгін, 3 сәуір күні Астанадағы қылмыстық істер жөніндегі мамандандырылған ауданаралық сотта мәдениет және спорт министрлігінің бұрынғы вице-министрі Ерлан Қожагапанов пен “SUCCESS K” стратегиялық коммуникациялар агенттігінің бас директоры Ләззат Көккөзоваға қатысты іс бойынша сот отырысы жалғасты, деп хабарлайды Ulysmedia.kz.
СОТ ОТЫРЫСЫ
Сот отырысы 40 минутқа жетпей аяқталды, басты мәселе – тәуелсіз сарапшыны іске тарту болды. Судья Қанат Тобабергенұлы мемлекеттік айыптаушының осыған қатысты өтінішін қанағаттандырды.
— Астана қаласының қылмыстық істер жөніндегі мамандандырылған ауданаралық соты мемлекеттік айыптаушының өтінішін қарап, мынадай шешім шығарды: қылмыстық іс бойынша арнайы білімге ие, Астаналық бағалаушылар палатасының мүшесі болып табылатын сарапшы-бағалаушыны іске тарту, деді ол.
Сарапшы 2018 жылы форумда пайдаланылған жабдықтар мен қызмет түрлеріне ұқсас жабдықтар мен қызметтердің орташа нарықтық бағасын анықтауы тиіс. Оның ішінде:
• проекциялық жүйелерді,
• процессорларды,
• бейне, дыбыс және жарық жабдықтарын жалдау құны қаралады.
ПРОКУРОРДЫҢ ЖАҢА ӨТІНІШІ
2 сәуір күні сот отырысында іс аяқталуға жақын қалғанда, прокурор күтпеген жерден жаңа өтініш жасап, процестің тағы да ұзап кетуіне себеп болды.
- Біздің ойымызша, негізгі сот тергеуі кезінде арнайы білімі мен тәжірибесі бар маманды тарту қажет болып отыр. Ол форумда пайдаланылған жабдықтар мен қызметтердің бағасын зерттеп, сараптамалық қорытынды беруі керек, деді прокурор.
Прокуратура 2018 жылы өткен форумда қолданылған құрал-жабдықтар мен түрлі қызметтердің сол кездегі орташа нарықтағы бағасын анықтап беру үшін арнайы сарапшы қажет деп отыр.
БҰҒАН ДЕЙІН
Еске салайық, бұған дейін қорғаушылардың сары майдай сақтаған «көзірлерін» алып шыққаны туралы жазған едік.
