Қазақстанның Біріккен Араб Әмірліктеріндегі елшілігінің бұрынғы кеңесшісі Сәкен Мамаш Астанада ұсталды, деп хабарлайды Ulysmedia.kz.
Бұл ақпаратты Астананың полиция департаменті растады.
- Өткен жылы елші кеңесшісінің бұрынғы көмекшісіне қатысты жұбайын жүйелі түрде соққыға жыққаны бойынша қылмыстық іс қозғалды. Полиция тарапынан жедел-тергеу тобы құрылып, оқиғаның барлық мән-жайын анықтау үшін қажетті сараптамалар кешені жүргізілді. Айтарлықтай дәлелдемелер жиналып, бекітілді. Тергеу нәтижесінде күдікті Сәкен Мамашқа қатысты тергеу соты оны қамауда ұстау түріндегі бұлтартпау шарасын таңдады. Тергеу мүддесі үшін алдын ала тергеудің басқа деректері жария етілмейді, дейді ПД өкілі Ұлысмедиаға.
КАРИНАНЫҢ ОҚИҒАСЫ
Карина Мамаш жақында күйеуі оны 10 жыл бойы физикалық және жыныстық зорлық-зомбылыққа ұшыратқанын айтқан еді. Әйелдің айтуынша, бірнеше күн бұрын Сәкен Мамаш оның БАӘ-ге қонаққа келген үлкен әпкесін де ұрып-соққан. Дипломаттың әйелі ауруханада, ал балалары әкесімен бірге болған.
Осы шудан кейін Қазақстан Сыртқы істер министрлігі дипломат елге қайтарылатынын хабарлады.
Қазақстан Сыртқы істер министрлігі дипломаттың әйелі Карина Мамашты елге жеткізу мәселесін шешіп, Карина көп өтпей елге оралды.
Астана полициясы Қазақстанның БАӘ-дегі елшісінің кеңесшісі Сәкен Мамаштың үстінен қылмыстық іс қозғады.
Кейін Карина Мамаш сұхбат беріп күйеуімен қалай танысқанын айтқан еді.
Ал Нүкте Youtube арнасына берген сұхбатында Сәкен Мамаштың әйелі дипломаттың әріптестері жанжалдың көпшілікке жария болғанын қаламағанын айтты.
Кейін дипломаттың әйелі алғашында кешірім сұраса, қазір қорқытып жатыр деп үндеу жариялаған.
Сәкен Мамаш желіде жазба жариялаған еді. Онда ол өзінің қарапайым ауыл баласынан, беделді қызметкер болғанға дейінгі өмір жолын сипаттап жазған. Қалай жоғары оқуға түскенін, ағылшын, орыс, түрік, араб тілдерін меңгергендігін тәптіштеп тұрып жазған. Каринамен отбасы құрғанын, балалы болғандарын баяндайды.
Содан соң әйелі тарапынан өзіне тағылған айыптарға жауап береді. “Зайыбым Карина мені экономикалық зорлық жасады деп айыптады” деген ол жұбайына жасаған қымбат сыйлықтарын, оны қай жерлерге қыдыртқанын да айтады. Бір сөзбен айтқанда одан ештеңе аямадым дейді.
