Каспий теңізінің жағалауында аққулардың өлексесі табылып жатыр, деп хабарлайды Ulysmedia.kz.
Lada.kz дерегінше, Маңғыстау облысының экология департаменті теңіз жағасынан, нақтырақ айтқанда, 4А шағын ауданында, бірнеше құстың өлексесі табылғанын растаған.
Осы жағдайға байланысты 3 сәуір күні мамандар теңіз суынан сынамалар алып, зертханалық талдау жүргізген. Экология департаменті зерттеу нәтижелерін қосымша жариялайтынын мәлімдеді.
Әлеуметтік желіде Ақтау тұрғындары қала маңындағы жағалаудан әлсіреген немесе өлі аққуларды жиі көріп жатқандарын хабарлап отыр.
Кейбір тұрғындардың айтуынша, олар құстарды құтқарып қалу үшін ветеринарларға жүгінген, алайда өкінішке қарай, қанаттыларды аман алып қалу мүмкін болмаған.
Бұған дейін видеограф Нұркен Тәжібай Каспийдің таязданып жатқанын көрсеткен бейнежазба жариялаған болатын.
