Желіде Алматыдағы медицина колледжінің студенттері АИТВ (ВИЧ) жұқтырған азаматтардың жеке мәліметтерін таратып жіберді деген ақпарат тарады, деп хабарлайды Ulysmedia.kz.
ҚҰПИЯ БОЛҒАН ҚҰЖАТ
Qumash порталының мәліметінше, ВИЧ диагнозы қойылған Алматы тұрғындарының жеке деректері тарап кеткен. Аталған мәліметтерді қаладағы медицина колледждерінің бірінде тәжірибеден өтіп жүрген студенттердің бірі зертханадағы жұмыс кезінде иеленген болуы мүмкін.
- WhatsApp топтарының бірінде студенттер ВИЧ-ке қатысты азаматтардың жеке мәліметтері мен сараптама нәтижелері бар құжаттарды бөліскен, делінген жазбада.
ПОЛИЦИЯ НЕ ДЕЙДІ
Ulysmedia.kz тілшісі бұл жағдайға байланысты Алматы қалалық полиция департаментінен ресми түсініктеме сұрады.
- Аталған факт бойынша Алматы қаласы Полиция департаменті тексеріс жүргізіп жатыр. Ақпараттың шынайылығы мен мән-жайы анықталған соң, ҚР заңнамасына сәйкес тиісті шаралар қабылданатын болады, деп хабарлады полиция өкілдері.
ҚАЗҰУ-ДАҒЫ ДАУ
Еске салайық, былтыр наурызда ҚазҰУ-дағы “пәк қыздардың тізімі” тарап, дау туған болатын.
ҚазҰУ шу тудырған оқиғаға қатысты түсініктеме берген болатын.
2024 жылғы 6 ақпанда университетке келісімшарт негізінде медициналық қызмет көрсететін «Smart Health University City» ЖШС медбикесі What’s app мессенджері арқылы механика-математика факультетінің флюорографиялық зерттеуден өтпеген 3-4 курс студенттерінің Excell форматындағы құжаттарын факультет деканатының маманына жіберді.
Алайда берілген құжаттарда студенттердің тегі мен аты-жөнінен басқа, медициналық құпияға қатысты мәліметтер де болған. Кейіннен университет студенттеріне қатысты дәрігерлік құпияны құрайтын дербес деректер мен мәліметтер мессенджерлер арқылы тарап кеткен, - делінген хабарламада.
ҚазҰУ баспасөз қызметінің хабарлауынша, осы факт бойынша 2024 жылғы 14 ақпанда университетте қызметтік тексеру тағайындалды.
