Қырғызстанның Джалал-Абад қаласында полиция қызметкерлері көшеде никаб киген әйелдермен түсіндіру жұмыстарын жүргізді. Бұл рейдтің фотоларын Қырғызстанның мемлекеттік ұлттық қауіпсіздік комитеті жариялады, деп хабарлайды Ulysmedia.kz.
Қырғызстанда биыл қаңтар айының соңында күшіне енген «Діни сенім бостандығы және діни бірлестіктер туралы» заңға сәйкес, қоғамдық орындарда никаб киюге тыйым салынған. Тыйымды бұзған азаматтарға 20 мың сом (шамамен 115 мың теңге) көлемінде айыппұл қарастырылған.
Жеке тұлғаны тануға кедергі келтіретін киімдерге шектеу қойылды
Заң бойынша адамның бет-жүзін жасыратын киімдерге (соның ішінде никабқа) тыйым салынған. Бұған қоса, басқа діндегілерді өз дініне тартуға, дінге бейтарап адамдар мен атеистерге үгіт жүргізуге, сондай-ақ діни жоралғыларды қарттар үйінде, түрмеде, әскери бөлімдерде өткізуге болмайды. Үй аралап діни әдебиет тарату мен білім беру мекемелерінде насихат жүргізу де шектелген.
Қазақстанда да талқыланған тақырып
2024 жылдың соңында Қазақстан мұсылмандары діни басқармасы (ҚМДБ) қоғамдық орындарда никаб киюге тыйым салу бастамасын қолдайтынын мәлімдеген болатын. Бұл мәселе ел ішінде бұрыннан бері пікірталас тудырып келеді.
ШВЕЙЦАРИЯ
Айта кетейік, биыл 1 қаңтардан бастап Швейцарияда "паранжаға тыйым" деп аталатын заң күшіне енген болатын.
ТӘЖІКСТАН
Сонымен қатар, былтыр Тәжікстан парламенті «Тәжікстан Республикасындағы салт-дәстүрлерді, мерекелер мен әдет-ғұрыптарды реттеу туралы» заңға түзетулер енгізіп, «ұлттық мәдениетке қайшы» деп аталатын киімдерді киюге тыйым салды.
РЕСЕЙ
Ал Ресейде никаб кигендерге 10 мың рубль айыппұл салынуы мүмкін.
