Мәжіліс депутаты Снежанна Имашева сот орындаушыларының жұмыс сапасын сынға алды, деп хабарлайды Ulysmedia.kz.
МӘН-ЖАЙ
– Көп жылдан бері мынадай үрдіс сақталып келеді: сот орындаушысы алдымен өзіне табыс әкелетін құжаттарды орындауға тырысады, ал басқа, әсіресе «әлеуметтік сипаттағы» құжаттарға күш пен уақытын мүлде аз бөледі. Мұндай істер бойынша олар борышкерді іздеуге, әңгімеге шақыруға, мүлік пен ақша қаражаттарын анықтап, тәркілеуге шара қолдануға құлықсыз. Мысалы, 2024 жылы 1 761 борышкердің жалпы қарызы 2,6 млрд теңге бола тұра, олар 5,8 млрд теңгеге онлайн-казино мен букмекерлік кеңселерге ақша тіккен, – деді депутат.
Сондай-ақ, оның айтуынша, Қонаев пен Щучинскідегі казиноларда 484 борышкер 325 млн теңге қарызы бола тұра, 147 млн теңгені ұтылып қалған.
ТАҒЫ БІРНЕШЕ ДЕРЕК
Имашева тағы да бірнеше нақты деректі келтірді:
2 536 борышкер 3,3 млрд теңге қарыз бола тұра, 5,1 млрд теңге табысын электронды әмияндарда жасырған;
72 адам 130 млн теңге берешегі бола тұра, сот арқылы әдейі 4 жылжымайтын мүлік пен 84 автокөлікті өз атына аударып алған;
117 борышкер 236 млн теңге қарызымен банк шоттарынан 2 млрд теңге шешіп алып, 55 млн теңгенің бағалы заттарын ломбардқа өткізген.
– Осы кезде сот орындаушылары не істеп отыр? Азаматтар мен басқа тараптар тарапынан сот орындаушыларының әрекетсіздігіне байланысты шағымдар – әділет департаменттері, палаталар мен соттарға жиі түсетін арыздардың бірі. 2024 жылы прокурорлар 6 210 борышкердің алимент, жалақы және мемлекет пайдасына төленуге тиіс қаражаттардан жалтарғанын анықтаған, – деп түйіндеді мәжілісмен.
