Brent маркалы мұнайдың бағасы бірнеше айдан бері алғаш рет барреліне $70-тан төмендеді, деп хабарлайды Ulysmedia.kz.
Нарық сыртқы саяси тұрақсыздық пен сұраныстың төмендеуі туралы болжамдарға жедел жауап берді. 24 маусымда Лондондағы ICE биржасында Brent маркалы мұнайының тамыз айындағы фьючерстері барреліне $69,06 бағамен саудаланды. Бұл — алдыңғы сауда деңгейінен 3,39%-ға төмен көрсеткіш.
Америкалық WTI мұнайы да арзандап жатыр: тамыз айындағы фьючерстер $66,20 деңгейіне түсті, бұл 3,37%-ға төмендеу деген сөз. Сауда сессиясы барысында Brent $67,5, ал WTI $64,38 деңгейіне дейін құлдырады.
Инвесторлар экономикалық және геосаяси қауіптер аясында шикізат активтерін жаппай сата бастады. Мұнай бағасының құлдырауы әлемдік сұраныстың азаюы мүмкін деген күтулермен және валюта нарығындағы тұрақсыздықпен байланысты.
Бағаға қосымша қысым ретінде АҚШ пен Қытайда монетарлық саясатты жұмсарту жөніндегі талқылаулар мен Таяу Шығыстағы тұрақсыз жағдай аталып отыр.
