Қазақстанның ең ірі бизнесмендері арасында ықпал, ресурстар мен бедел үшін жасырын күрес жүріп жатыр, деп хабарлайды Ulysmedia.kz DW басылымына сілтеме жасап.
ОЛИГАРХТАРДЫҢ РЕЙТИНГІ ҚҰЛАП ЖАТЫР
Мамыр айының ортасында Forbes Kazakhstan елдегі ең бай адамдардың жаңартылған тізімін жариялады. Бұл тізім сенсацияға айналды: "Назарбаев дәуірінің" ықпалды тұлғалары көшбасшылық орнын жоғалтты. Көп жылдан бері рейтингтің бірінші сатысында тұрған миллиардер Владимир Ким үшінші орынға түсті. Мұнайдан бастап банкке дейінгі бизнес-империяға ие Тимур мен Динара Құлыбаевтар әдеттегі екінші орыннан төртінші орынға ығыстырылды. Қазір бірінші орынды Kaspi.kz басшысы Вячеслав Ким иеленіп отыр – оның байлығы 7,1 млрд доллар деп бағаланған. Ал екінші орында АҚШ-та тіркелген Freedom Holding Corp. компаниясының негізін қалаған Тимур Турлов тұр. Оның байлығы – 5,8 млрд доллар.
КҮДІК ПЕН САЯСИ АСТАР
Дегенмен, ең көп талқылау тудырған – Турловтың жылдам дамуы болды. Оның бизнесі – өндірістік базасы жоқ қаржылық технологиялар саласында. DW тілшісімен анонимді түрде сөйлескен «Amanat» партиясының мәжіліс депутатының айтуынша, Мәжілісте Турловтың Ресейдің арнайы қызметтерімен байланысы болуы мүмкін деген болжамдар мен оның холдингі арқылы Мәскеудің санкциялардан айналып өтуі жиі талқыланып жүр.
ДЕПУТАТТЫҢ СӨЗІ
- 2022 жылы Украина оны санкциялық тізімге енгізді. Сол кезде ол Қазақстан азаматы болып үлгерген дейді. Бірақ жел тұрмаса, шөптің басы қимылдамайды ғой, – деді депутат.
Парламентарий сондай-ақ Турловтың бизнес-активтілігін Ресейдің Қазақстанға бағытталған "экономикалық экспансиясының" бір бөлігі болуы мүмкін деп санайды. Оның айтуынша, Freedom құрылымдары телекоммуникация, сақтандыру, сауда және медиа саласында жылдам кеңейіп жатыр, ал олардағы басшылық қызметті Ресейден шыққан азаматтар иеленуде.
ТУРЛОВТЫҢ ЖАУАБЫ
Өз кезегінде Турлов барлық айыптауды үзілді-кесілді жоққа шығарды. Ол ФСБ-мен байланысы бар деген күдіктерді "ақылға қонымсыз" деп атап, ешқашан саясатқа араласпағанын және көлеңкелі схемаларға қатыспағанын айтты. Украина тарапынан енгізілген санкцияны қателік деп бағалап, оның холдингі украин қайырымдылық бастамаларына қолдау көрсетіп, Ресей агрессиясын айыптағанын атап өтті.
- Біз компанияларымызды қаралап, қор биржасындағы акцияларымыздың құнын төмендетуге бағытталған науқанның құрбанына айналдық, – деді Турлов.
Ол сондай-ақ америкалық Hindenburg Research пен Citron Research жүргізген зерттеулерді еске салды. Бұл ұйымдар оның компаниясын қор нарығында манипуляция жасады деп күдіктенген. Турловтың пікірінше, бұл шабуылдар Қазақстаннан бастау алған және батыс аудиторияcына бағытталған стереотиптік айыптауларға негізделген. KazTAG ақпарат агенттігінің бас редакторы Әмір Қасенов те Freedom холдингінің қызметіне күмән келтіріп отыр. Оның айтуынша, Freedom туралы ресми органдардан нақты жауап ала алмай келеді. Қасенов бұл құрылым санкцияларды айналып өтуге қатысы бар болуы мүмкін деп санайды, бірақ қолындағы материалдарды жариялауға рұқсат күтіп отырғанын айтты. Сондай-ақ ол өзіне қарсы ақпараттық шабуыл басталғанын, орыс тілді Telegram-арналар мен шетелдік сайттарда өзіне қатысты жағымсыз жарияланымдардың бір сәтте пайда болғаны күдікті екенін мәлімдеді. Оның сенімді пайымынша, бұл шабуылдардың артында бір ғана дереккөз тұр.
Парламенттегі дереккөздердің пікірінше, бұл ақпараттық соғыстың шынайы себебі алтын, кобальт, көмір және басқа да ресурстар бар 40 жер телімін сату бойынша алдағы аукцион. Қойылған мөлшерлеме өте жоғары, сондықтан депутаттың айтуынша, жақын арада медиа мен Telegram-арналарда Турловқа және Forbes Kazakhstan тізіміндегі өзге де адамдарға қарсы жаңа қаралау толқынын көріп қалуымыз мүмкін.
