Семейде 29 тамызда Семей ядролық полигонының жабылған күніне орай жоспарланған "Жара" ("Рана") деректі фильмінің көрсетілімі Арбатта өтпей қалды, деп хабарлайды Ulysmedia.kz.
ТОЛЫҒЫРАҚ
Фильмді халықаралық құқықтанушы, құқық қорғаушы әрі режиссер Әйгерім Сейтенова түсірген. Картина ядролық сынақтардың салдарынан зардап шеккен әйелдердің тағдырына арналған. Мәселен, кейіпкерлердің бірі балаларынан айырылса, енді бірі онкологиялық дерттің кесірінен ана атана алмаған. Бұл туынды бұған дейін Нью-Йорктегі БҰҰ штаб-пәтерінде, сондай-ақ Женевада, Лондонда, Парижде, Шотландия парламентінде және Германияның бірнеше қаласында көрсетілген.
СЕБЕПСІЗ БАС ТАРТУ
Сейтенованың айтуынша,көрсетілімді ұйымдастырушылар Alikhan Bokeikhan University-мен келіскен. Университетке қарама-қарсы орналасқан Арбаттағы LED-экранды қолдану жоспарланған. Алайда кейін қала әкімдігі іс-шараға рұқсат бермей қойған.
– LED-экран Семей әкімдігіне тиесілі. Бәрі келісілгендей болып еді, ректор да қолдау көрсетті. Сондықтан әкімдікпен бөлек келісу керек деп ойламадық. Жарнаманы бастап жібердік, бірақ өткен аптада, қателеспесем, сенбі күні көрсетілім өтпеуі мүмкін екенін айта бастады. Ал көрсетілімге бір сағат қалғанда ұйымдастырушы Майра Әбеноваға хабарласып, болмайды деді. Себебін түсіндірмеді. “Бәрі тоқтатылады” деп қана айтқан, – деді Сейтенова Ulysmedia.kz тілшісіне.
– Бізді жай ғана елемеді. Мен осы қаланың әйелдері туралы фильм түсірдім, бірақ олар оны өз туған жерінде көре алмай отыр. Мен берілгім келмейді. Қазақстанда бұл фильмді көрсетемін деген үмітім бар, – деп қосты ол.
Фильм авторы шетелде көрсетілім ұйымдастыру өз туған қаласына қарағанда оңай болғанына қынжылысын білдірді. Ulysmedia тілшісі жағдайды анықтау үшін Семей әкімдігіне сауал жолдады.
АНЫҚТАМА
Еске салайық, Семей ядролық сынақ полигоны 1949 жылдан 1991 жылға дейін жұмыс істеп, әлемдегі ең ірі сынақ алаңдарының біріне айналды. Осы кезеңде 450-ден астам ядролық жарылыс жасалып, оның басым бөлігі ашық ауада өткізілді. Салдарынан Шығыс Қазақстанның ондаған мың тұрғыны радиацияға ұшырап, онкологиялық аурулар, туа біткен патологиялар және репродуктивті денсаулық мәселелері көбейді.
1991 жылғы 29 тамызда Қазақстанның экс-президенті Нұрсұлтан Назарбаевтың жарлығымен полигон ресми түрде жабылды. Кейін бұл күн Ядролық сынақтарға қарсы халықаралық іс-қимыл күні болып жарияланды.
