Анкарада жексенбі күні Түркияның негізгі оппозициялық күші – Республикалық халық партиясы (РХП) ұйымдастырған наразылық акциясына кемінде 50 мың адам жиналды. Бұл шара дүйсенбіге белгіленген сот отырысының қарсаңында өтті. Сот шешімі партияны басшылықтан айыруы мүмкін, деп хабарлайды Ulysmedia.kz.
Тандоған алаңын толтырған халық
Наразылық білдірушілер Анкарадағы Тандоған алаңын толықтай толтырды. Олар түрік туларын ұстап, республика негізін қалаушы Мұстафа Кемал Ататүріктің бейнесі бейнеленген футболка киіп шыққан. Бұл әрекет билікке ашық қарсылық ретінде қабылданды.
РХП төрағасының орынбасары Мурат Бакан митингке 50 мың адам келгенін мәлімдеді.
«Бұл – сот төңкерісі»
Өз сөзінде РХП жетекшісі Өзгүр Өзел істі «сот төңкерісі» деп атады. Оның айтуынша, процестің негізгі мақсаты – өзін биліктен шеттету.
– Бұл үкімет демократияны қаламайды. Олар егер демократия орнаса, сайлауда жеңе алмайтынын біледі. Әділдікті де қаламайды: егер әділдік орнаса, қылмыстарын жасыра алмайды. Бұл – саяси іс, тағылған айыптар – жала. Бұл төңкеріс, біз оған қарсы тұрамыз. Түркия үкіметі демократиялық жолдан бас тартып, дауыс берудің орнына репрессияны таңдады. Өкінішке қарай, билікке қауіп төндіретін кез келген адам енді оның нысанасына айналды, – деді ол.
Өзель сөзін президентке бағыттап: «Ердоған, сен Тандоған алаңын осындай күйде көріп пе едің?» – деп аяқтады. Ал жиналғандар «Ердоган, отставкаға кет!» деп ұрандатты.
Сот шешімін кейінге қалдырды
Дүйсенбі күні Анкара соты РХП-ның 2023 жылғы қарашада өткен съезінің нәтижелерін жоюға қатысты шешімді кейінге қалдырды. Сол съезде Өзгүр Өзель партияның жаңа лидері болып сайланған еді.
Сыншылар бұл істі Түркиядағы ең көне саяси партияны әлсіретуге бағытталған саяси қадам деп санайды. РХП 2024 жылғы жергілікті сайлауда президент Режеп Тайып Ердоғанның Әділет және даму партиясына (ӘДП) ауыр соққы берген болатын. Қазір оппозициялық күш халық арасында танымалдылық жағынан қарқынды өсіп келеді.
