Жастар арасындағы қылмыс өршіп барады, ресми статистика бұған дәлел, деп хабарлайды Ulysmedia.kz.
СОҢҒЫ АЛТЫ ЖЫЛДАҒЫ ЕҢ ЖОҒАРЫ КӨРСЕТКІШ
Қазақстанда 2025 жылы 1703 жасөспірім қылмыстық жауапкершілікке тартылды. Бұл өткен жылмен салыстырғанда 35%-ға көп. Сарапшылардың мәліметінше, мұндай көрсеткіш соңғы алты жылдағы ең жоғары деңгейге жеткен.
НЕГІЗГІ ҚЫЛМЫСТАР
Жасөспірімдер арасында ең көп тіркелген қылмыс – ұрлық. Биыл осы бап бойынша 499 жас, негізінен 16–17 жастағы жасөспірімдер жауапқа тартылды.
Сондай-ақ бұзақылық, денсаулыққа әдейі жеңіл зиян келтіру, соққы беру және тонау істері жиілеген. Әсіресе, бұзақылық бойынша өсім айтарлықтай: биыл тоғыз айда 216 жасөспірім тіркелсе, былтыр осы уақытта небәрі 94 болған.
НЕ ҮШІН АЛАҢДАУЛЫ КӨРСЕТКІШ?
Мамандар қылмыстың өсуін әлеуметтік ортадағы қиындықтармен және жастар арасындағы тәртіп мәселелерімен байланыстырады. Бұл ретте құқық қорғау органдары мен қоғам тарапынан жасөспірімдерге көбірек назар аудару қажеттігі айтылып отыр.
