Батыста тағы мұнайшылар бас көтере ме

ТАҒЫ ДА ЕҢБЕК ДАУЫ

Сала сарапшысы, журналист Олег Червинскийдің хабарлауынша, «Tethys Petroleum» компаниясының еншілес ұйымы — «Кул-Бас» ЖШС қызметкерлері жаңа ұжымдық шарттың ұзаққа созылуына байланысты ереуілге шығуға дайын екенін мәлімдеді. Бұл еңбек дауы екі жылдан бері жалғасып келеді. Қызметкерлер жаңа шартқа қол қоюды сұрап, басшылыққа жүгінген, себебі ескі келісім 2016 жылы-ақ күшін жойған.

МЫНАДАЙ ТАЛАПТАРЫ БАР

Жұмысшылар 13 әлеуметтік кепілдікті енгізуді ұсынды:

• азық-түлік инфляциясын ескере отырып, жалақыны жыл сайын индексациялау;
• тоқсан сайынғы сыйақы — бір айлық көлемінде, бірақ 1 млн теңгеден аспауы тиіс;
• республикалық мерекелерге — 2 ЕТЖ көлемінде сыйақы;
• Мұнайшылар күніне арналған сыйақы;
• жыл қорытындысы бойынша сыйақы (13-ші жалақы);
• демалысқа шығу кезінде бір айлық көлемінде материалдық көмек.

КЕЛІССӨЗДЕР

Алайда талқылау барысында бұл тізім 9 тармаққа дейін қысқарды. Басшылықпен екі рет кездескеннен кейін келісілген нұсқа директорлар кеңесіне бекітуге жіберілді, бірақ кейін келіссөздер тоқтатылды.

Кен орнында өндіру жұмыстары қайта басталғанына қарамастан, директорлар кеңесі ұсынған жаңа шарт жұмысшылардың жағдайын едәуір нашарлатқан. Құжаттан көптеген маңызды әлеуметтік жеңілдіктер алынып тасталғаны айтылып, ұсынылған шарттар қызметкерлер үшін қолайсыз деп танылған.

— Тамыз айынан бері компанияда директорлар кеңесінің отырыстары дерлік ай сайын өтіп келеді, онда ұжымға дәл сол нұсқа мәжбүрлі түрде ұсынылады, ал ол нұсқамен қызметкерлер мүлде келіспейді. Ешқандай ымыра ізделмейді — «арба сол күйі тұр», дейді жұмысшылар. «Кул-Бас» компаниясы төңірегіндегі дау кеңірек мәселені ашып берді: пайда табуды көздейтін директорлар кеңесінің кабинеттегі стратегиясы мен жергілікті жерде лайықты жалақы мен әлеуметтік қорғанышты қалайтын жұмысшылардың шынайы жағдайы арасындағы алшақтық, — деп жазады hronika.kz.

Егер директорлар кеңесі келіссөздерді қайта бастамаса, жұмысшылар Қазақстан үкіметіне жүгінуге дайын.