Ташкент облысында түрмеден 31 жастағы ер адам қашып кетті. Ол сот шешімімен педофил деп танылған. Оның қашып кетуіне жол берген қызметкерлер жазаланды, деп хабарлайды Ulysmedia.kz.
МӘН-ЖАЙ
Педофил деп танылып сотталған ер адам Ташкент облысының Ахангаран ауданындағы колониядан қашып шыққан. Бостандыққа шыққан соң ол үшінші сынып оқушысын зорлаған. Қазіргі уақытта күдікті ұсталып, қылмыс пен қашу дерегі бойынша тергеу жүргізілуде.
Зардап шеккен қыз бала «Инсон» әлеуметтік қызмет көрсету орталығының мамандарының бақылауында. Оған психологиялық көмек көрсетіліп жатыр.
Ал ішкі істер министрлігіне қарасты жазаларды орындау департаментінің Орталық тергеу изоляторы режим бөлімінің инспекторлары мен өзге де жауапты тұлғаларға қатысты қылмыстық іс қозғалды.
КОНТЕКСТ
Бұған дейін, қазан айында Наманган қаласында жеті жастағы қыздың зорланғаны белгілі болған. Осы оқиғадан кейін Өзбекстан Олий Мажлисінің депутаты Дилноза Азизова балалардың жыныстық қол сұғылмаушылығына қарсы қылмыстар үшін жазаны қатаңдатуды және педофилдерге өмір бойы бас бостандығынан айыру жазасын заңмен бекітуді ұсынған.
Айта кетсек, 2023 жылдың ақпанында өзбек депутаттары педофилдерге химиялық кастрация енгізуді, сондай-ақ сотталғандардың тізімін жариялауды және оларға мектептер мен оқу орындарынан 10 шақырым радиуста тұруға тыйым салуды ұсынған болатын.
