Атырауда ата-аналар бірнеше күннен бері балалар арасында аурудың күрт өсуін талқылап жатыр. Кейбір мектептер мен балабақшаларда балалардың қатысуы азайған.
Жергілікті денсаулық сақтау басқармасы аурудың себебі «гонконг тұмауы» болуы мүмкін деген ақпаратты жоққа шығарды, деп хабарлайды Ulysmedia.kz.
ТОЛЫҒЫРАҚ
Атыраулықтар симптомдардың бірнеше сағат ішінде пайда болатынын атап өтуде.
– Таңертең ұлым сергек еді, әдеттегідей мектепке кетті. Түсте қоңырау шалды: «Температурасы 39 градусқа жақындап тұр, алып кетіңіз». Басым қатты ауырып тұр, орнымнан тұра алмаймын дейді, – дейді Атырау тұрғыны.
“Ақ Жайық” мәліметінше, осындай жағдай балабақшаларда да байқалады.
– Қызым таңертең мүлде қалыпты жағдайда болды. Бірнеше сағаттан кейін тәрбиеші: «Қызуы көтеріліп жатыр, тамағын ұстап тұр, әлсіз» деді. Барлығы өте тез басталады, – дейді баланың ата-анасы.
Ауырған балалардың басым бөлігінде бірдей белгілер тіркелген: бас ауруы, әлсіздік, қалтырау, дене қызуының көтерілуі және тамақтың жыбырлауы. Жөтел бірден пайда болмайды немесе мүлде болмайды.
ДӘРІГЕРЛЕРДІҢ ЖАУАБЫ
Дәрігерлер бұл жағдайды күзде жабық ұжымдарда жиілейтін маусымдық вирустық инфекциялардың өршуімен байланыстырады.
– Бұл көрініс маусымдық жедел респираторлық вирустық инфекцияларға тән. Температураны бақылау, баланы сұйықтықпен қамтамасыз ету және жағдайын бақылау қажет, – дейді мамандар.
Мамандар мүмкін болатын асқынулар туралы деректер әлі нақтыланып жатқанын айтады. Қазіргі таңда шағымдардың басым бөлігі жедел вирустық симптоматикамен байланысты.
Атырау инфекциялық ауруханасының мәліметінше, 15–16 қараша күндері қабылдау бөліміне 218 науқас түскен: әр жастағы балалар мен жүкті әйелдер. Бұл кезеңде 15 жастан асқан ересектер ауруханаға жатқызылмаған.
– Аурудың ресми өршуі тіркелген жоқ, өңірде «гонконг тұмауы» диагнозы қойылмаған, – деді Атырау облыстық денсаулық сақтау басқармасының баспасөз хатшысы Нұрайым Маханова.
Атыраудағы мектептер мен балабақшалар қалыпты режимде жұмыс істеуде. Бірқатар мекемеде жұқтыру қаупін азайту үшін уақытша маска тағу тәртібі енгізілген. Ата-аналар чаттарында онлайн оқуға көшу мүмкіндігі талқылануда: жаппай сырқаттану кезінде балалар оқу процесінен қалып, материалды меңгеруде артта қалады.
БҰҒАН ДЕЙІН
Астанадағы тұрғындардың басым бөлігі гонконг тұмауымен ауырып жатқаны хабарланған. Астана қаласының бас мемлекеттік санитарлық дәрігері Айгүл Шагалтаева зертханалық мониторинг барысында ЖРВИ және тұмау белгілері бар науқастардан алынған 285 сынаманың 116-сы оң нәтиже бергенін мәлімдеген. Бұл – A(H3N2) тұмау вирусы.
АНЫҚТАМА
A(H3N2) тұмау вирусы, яғни гонконг тұмауы — A типті тұмау вирусының бір тармағы. Ол жедел респираторлық инфекцияларды тудырады. Жұқпалығы жоғары, мутацияға бейім және маусымдық эпидемиялар тудыру қабілеті бар. H3N2 алғаш рет 1968 жылы Гонконгте анықталып, бүкіл әлемде шамамен 1 миллион адамның өмірін қиған пандемияға себеп болған. Содан бері жыл сайын айналымда жүріп, мутацияланып, бейімделіп отырады, бұл оны болжауға қиын етеді.
