Еурокомиссия төрайымы Урсула фон дер Ляйен Женевадағы келіссөздерді «соғысты реттеудің берік негізі» деп атады. Ал Еуропалық кеңес төрағасы Антониу Кошта бұл диалогқа «жаңа серпін» берілгенін мәлімдеді, деп хабарлайды Ulysmedia.kz.
ТОЛЫҒЫРАҚ
Еуропалық Одақтың жетекшілері дүйсенбі, 24 қараша күні Ресейдің Украинаға қарсы соғысын тоқтату жөніндегі келіссөздердегі ілгерілеуді құптады. Дегенмен, АҚШ-тың бейбіт жоспарымен байланысты Женевада жасалған талпыныстарға қарамастан, шешілмеген мәселелердің әлі де бар екенін атап өтті.
«Жұмыс әлі аяқталған жоқ, бірақ қазір алға жылжу үшін берік негіз бар», – деді Еурокомиссия төрайымы Урсула фон дер Ляйен Анголаның астанасы Луандада өткен ЕО мен Африка одағы саммитінің кулуарында.
ФОН ДЕР ЛЯЙЕН: БІЗ УКРАИНАНЫ ҚОЛДАУДА БІРІККЕНБІЗ
ЕО көшбасшыларының бейресми кездесуінен кейін журналистерге сөйлеген сөзінде фон дер Ляйен одақтастарды «бірлікті сақтап, Украина мүдделерін күш-жігердің ортасына қоюға» шақырды.
«Бұл – бүкіл құрлығымыздың қауіпсіздігі туралы мәселе. Бүгінгі және болашақ үшін. Луандадағы кездесу тағы да біздің Украинаны қолдауда бірлігімізді дәлелдеді», – деп атап өтті ол.
Ол ЕО-ның алдағы уақытта ұстанатын «негізгі еуропалық қағидаттарын» атады.
КОШТА: КЕЛІССӨЗДЕР ЖАҢА СЕРПІН АЛДЫ
Өз кезегінде Еуропалық кеңес төрағасы Антониу Кошта бейбіт келіссөздерге «жаңа серпін» берілгенін мәлімдеді.
«Әлі шешілмеген мәселелер бар, бірақ бағыт оң», – деді ол Украина мен АҚШ өкілдерінің Женевадағы кездесуін бағалай отырып.
Кошта ЕО-ға тікелей қатысты мәселелерді – санкциялар, кеңею немесе Ресейдің мұздатылған активтері – «Еуропалық Одақтың толық қатысуын және шешімін талап етеді» деп атап өтті.
