«Ақ жол» партиясының төрағасы, Мәжіліс депутаты Азат Перуашев қабылданған салық реформасы бизнес пен қарапайым азаматтар үшін елеулі қиындықтарға әкелетінін мәлімдеді, деп хабарлайды Ulysmedia.kz.
ТОЛЫҒЫРАҚ
Оның айтуынша, құжатты талқылау барысында партия тарапынан 100-ден астам түзету ұсынылғанымен, олардың басым бөлігі қабылданбаған. Азат Перуашев үкімет президенттің тапсырмасын және депутаттардың Еуропалық одақ елдерінде кеңінен қолданылатын салалық ҚҚС мөлшерлемелеріне көшу жөніндегі ұсыныстарын елемей отыр деп есептейді.
– Алда қиындықтар мен сынақтар күтіп тұр. Әлемнің көп елінде салық мөлшерлемелері саланың орташа табыстылығына және оның әлеуметтік маңызына қарай белгіленеді. Мысалы, ЕО елдерінде жалпы ҚҚС 20–25% болуы мүмкін, ал ауыл шаруашылығы үшін ол мүлде нөлге тең. Азық-түлік өндірісіне — 3–5%, киім мен аяқ киімге — 5–6%, техника мен инновациялық технологияларға — 5–8% мөлшерлеме қолданылады. Бізде салалық мөлшерлемелер енгізіледі деген мәлімдемелерге қарамастан, іс жүзінде бұрынғы тәсілдер сақталып қалды. Нақты өзгеріс болған жоқ, — деді ол.
B2B ШЕГЕРІМДЕРІНЕ ТЫЙЫМ
Перуашев сондай-ақ әртүрлі салық режимінде жұмыс істейтін кәсіпкерлер арасындағы B2B мәмілелерді шегерімге жатқызуға тыйым салынуын сынға алды.
— Бұл салық салудың өз методологиясына қайшы. Салық бизнеске белгілі бір форматта жұмыс істеуге тыйым салмауы керек. Бұл — қате шешім. Бізге «бизнес бөлшектеуге қарсы күрес» деп түсіндіреді. Онда жаңа кодекске «бизнес бөлшектеу» деген ұғымды нақты енгізу қажет. Ал ол кодексте мүлде жоқ, — деді депутат.
КОНТЕКСТ
Еске салайық, 2026 жылдың 1 қаңтарынан бастап Қазақстанда жаңа Салық кодексі күшіне енеді. Қосылған құн салығының (ҚҚС) жалпы мөлшерлемесі 12%-дан 16%-ға дейін өседі. Алайда бұл өзгеріс жалғыз емес. Бұған дейін Ulysmedia.kz редакциясы 2025 жылдың соңына қарай қазақстандық кәсіпкерлердің көңіл күйі мерекелік болмайтынын жазған. ҚҚС-тың өсуінен бөлек, банктер өз қызметтері үшін комиссияларды арттырады, ал көптеген кәсіпкерлер «жеңілдетілген» салық режимімен қоштасуға мәжбүр болады.
