Ұлттық кәсіпкерлер палатасы «Атамекен» жоғары білім сапасына арналған республикалық форумда 2025 жылғы білім беру бағдарламалары рейтингі бойынша деректерді жариялады, деп хабарлайды Ulysmedia.kz.
ТОЛЫҒЫРАҚ
Анализ қорытындысына сәйкес, қазақстандық жоғары оқу орындарының түлектерінің жалпы жұмысқа орналасу деңгейі 84 пайызды құрады. Оның ішінде 68 пайызы тұрақты жұмыспен қамтылған.
Медиандық жалақы көлемі 203 398 теңгеге жетті. «Атамекен» бұл көрсеткішті сапалы дайындықтан өткен мамандарға сұраныстың артуымен байланыстырады.
РЕЙТИНГ ЖАСАУ ЖӘНЕ ӘДІСТЕМЕ
Рейтинг сегізінші жыл қатарынан Қазақстан Республикасы Ғылым және жоғары білім министрлігінің тапсырысы бойынша жасалып келеді.
2025 жылы сарапшылар 95 173 түлектің деректерін талдап, 100-ден астам маманды тартып, 2031 білім беру бағдарламасы бойынша 117 рейтинг құрды.
Бағалау төрт негізгі блок бойынша жүргізілді. Әсіресе түлектердің мансаптық мүмкіндіктеріне – жұмысқа орналасу деңгейіне, жұмыс табу жылдамдығына және медиандық жалақыға ерекше назар аударылды.
САЛАЛАР БОЙЫНША КӨРСЕТКІШТЕР
Ең жоғары нәтижелер ауыл шаруашылығы, ветеринария, инженерлік және жаратылыстану бағыттарында тіркелді.
Ал ең жоғары жалақы деңгейін тау-кен өндірісі мен металлургия салалары көрсетті. Бұл бағыттарға отандық компаниялар ұлттық мамандарды даярлауға және дамытуға белсенді инвестиция құйып отыр.
ӨҢІРЛЕРДЕГІ ЖАҒДАЙ
Ең жоғары жұмысқа орналасу деңгейі Шығыс Қазақстан, Солтүстік Қазақстан және Алматы облыстарында – 91 пайыз.
Қостанай және Ұлытау облыстарында көрсеткіш – 90 пайыз.
Ал төмен деңгей Жамбыл облысында – 74 пайыз, Шымкент қаласында – 77 пайыз және Қызылорда облысында – 79 пайыз болып тіркелді.
«АТАМЕКЕН» ПІКІРІ
Ұлттық кәсіпкерлер палатасының Адам капиталы департаментінің директоры Азамат Бейсенбенов рейтингтің жоғары оқу орындары мен бизнес арасында нақты серіктестік орнатуға көмектесетінін атап өтті.
«Экономикалық патриотизм қағидаттарын ұстанатын бизнес үшін қай білім беру бағдарламалары шынымен сұранысқа ие мамандарды дайындайтынын білу маңызды. Біздің рейтинг – формалды бағалау емес, кері байланыс құралы. Ол жоғары оқу орындарына олардың күшті тұстарын және тәжірибелік дайындықты, жұмыс берушілермен байланыс пен экономиканың нақты қажеттіліктеріне бағдарды күшейту қажет аймақтарды көрсетеді», – деді Бейсенбенов.
Оның айтуынша, рейтинг университеттерге оқу мазмұнын жүйелі түрде жаңартуға, тәжірибеге бағытталған форматтарды кеңейтуге және жұмыс берушілерді білім беру бағдарламаларын әзірлеуге белсенді тартуға мүмкіндік береді.
