Мемлекеттік кеңесші Ерлан Қарин комиссияның кезекті отырысында Қазақстанның қолданыстағы Конституциясына қатысты өз бағасын айтты, деп хабарлайды Ulysmedia.kz.
ТОЛЫҒЫРАҚ
Оның сөзінше, қазіргі Конституцияның жекелеген баптарын бірнеше рет оқығанның өзінде, олардың мағынасын түсіну қиын.
- 1995 жылы қабылданған көптеген баптарда дәл емес, күрделі тұжырымдар бар. Бұл оларды қабылдауды қиындатады, — деді Қарин.
Мемлекеттік кеңесші мысал ретінде Конституцияның 13-бабының 1-тармағын келтірді. Аталған нормада: «Әркімнің құқық субъектісі ретінде танылуына құқығы бар және өзінің құқықтары мен бостандықтарын, қажетті қорғанысты қоса алғанда, заңға қайшы келмейтін барлық тәсілдермен қорғауға хақылы» деп жазылған.
- Осы сөйлемнен нақты не түсінуге болады? Оқырман да, тыңдаушы да бұл баптың мағынасын толық ұғына алмайды, — деді ол.
Ерлан Қариннің айтуынша, әзірленіп жатқан жаңа құжат бұрынғы Конституциядан айтарлықтай ерекшеленеді. Сонымен қатар, ол Конституция жобасын қолдаған азаматтарға алғысын білдірді.
