Қазақстанда балалар арасындағы аутизм жағдайлары күрт өсіп жатыр. Үкімет мұның себептері мен қабылданып жатқан шараларды түсіндірді, деп хабарлайды Ulysmedia.kz.
Жылдық өсім – 35%
Қазақстанда жыл сайын аутизм спектріндегі бұзылыстары бар балалар саны артып келеді. Үкімет дерегіне сәйкес, өсім жылына шамамен 35%-ға жетеді. Бұл туралы депутаттық сауалға жауап берген Олжас Бектенов мәлімдеді.
Қазір елде психикалық бұзылыстарға байланысты мүгедектігі бар 32,4 мың бала тіркелген. Оның 13,9 мыңы — аутизм спектріндегі бұзылыстар (АСБ) диагнозымен.
Науқастардың көбеюіне не себеп
Соңғы үш жылда аутизмі бар балалар саны екі есеге жуық артқан: 7,6 мыңнан 13,9 мыңға дейін.
«Соңғы үш жылда аутизм салдарынан мүгедектігі бар балалар саны 7,6 мыңнан 13,9 мыңға дейін өсті. Жыл сайынғы өсім – 35%. Бұл ең алдымен анықтау деңгейінің артуы мен ерте диагностиканың енгізілуіне байланысты. Атап айтқанда, 16–30 айлық балаларда АСБ қаупін анықтауға арналған M-Chat ерте скринингі енгізілді. Бұрын мұндай балалар статистикаға толық енбей келген», – делінген ресми жауапта.
Осылайша, өсімнің негізгі себебі тек нақты жағдайлардың көбеюі емес, диагностика жүйесінің жақсаруы екені атап өтіледі.
Аутизм қалай анықталады
Қазақстанда аутизм белгілерін ерте анықтау үшін арнайы скрининг жүйесі енгізілген. Ол перзентханаларда да, емханаларда да жүргізіледі.
Психофизикалық тексеру бірнеше кезеңнен тұрады:
— туғаннан кейін бірден;
— емханаларда жоспарлы тексеру кезінде;
— қайта қарау және бақылау кезеңі.
Егер мамандар қандай да бір ауытқуларды байқаса, бала педиатр, невропатолог және психиатрға қосымша тексерілуге жіберіледі. Бұдан кейін тереңдетілген диагностика жасалады.
Емдеу тәсілдері
Премьер-министрдің айтуынша, аутизмді емдеу көбіне дәрі-дәрмекке негізделмейді. Негізгі көңіл мінез-құлық терапиясына, білім беру бағдарламаларына және психологиялық қолдауға бөлінеді. Мұндай тәсілдер баланың қоғамға бейімделуіне және өмір сапасын жақсартуға көмектеседі.
